आष्टी (बीड): राज्याचे गृहमंत्री अनिल देशमुख यांनी सचिन वाझे यांना दर महिन्याला १०० कोटी रूपये गोळा करण्याचे टार्गेट दिल्याचा आरोप मुंबईचे माजी पोलीस आयुक्त परमबीर सिंग यांनी केल्यानंतर भाजपच्या वतीने आमदार सुरेश धस यांच्या उपस्थितीत आज (ता. 21) येथील शिवाजी चौकात गृहमंत्र्यांच्या पुतळ्याला शंभर कोटींच्या नोटांचा प्रतिकात्मक हार घालून राज्य सरकारचा निषेध नोंदविण्यात आला.

पुरावे लक्षात घेता गृहमंत्री अनिल देशमुख यांच्यावर करण्यात आलेले आरोप हे महाराष्ट्राची मान शरमेने खाली घालायला लावणारे आहेत. यशवंतराव चव्हाण, लोकनेते गोपीनाथराव मुंडे, आर.आर.पाटील यांच्यासह विरोधी पक्षनेते व माजी मुख्यमंत्री देवेंद्रजी फडणवीस साहेब यांनी स्वकर्तृत्वावर निष्कलंकपणे काम करून गृहखात्याची मान उंचावली.

मतदान केंद्राबाहेर तणाव, जिल्हा मध्यवर्ती बँक निवडणूक

हे प्रकरण अत्यंत गंभीर असून या बाबत मुख्यमंत्र्यांनी व पक्षाच्या प्रमुखांनी तत्काळ निर्णय घ्यावा व गृहमंत्री अनिल देशमुख यांनी या पदावर राहू नये, अशी जनतेतून मागणी होत असल्याचे आमदार सुरेश धस यांनी या वेळी बोलताना सांगितले.

या वेळी युवानेते जयदत्त धस, महेंद्र गर्जे, बद्रीनाथ जगताप, माऊली जरांगे, गणेश शिंदे, सभापती दत्तात्रय जेवे, भारत मुरकुटे, रंगनाथ धोंडे, रमजान तांबोळी, अनिल ढोबळे , सुनील रेडेकर, किशोर झरेकर, अमोल शिंदे, विनोद रोडे, यशवंत खंडागळे, शफी सय्यद, अतुल कोठुळे, सागर धोंडे, अशोक ढवण, अक्षय धोंडे, जालिंदर पोकळे, विजय धोंडे, साधू हंबर्डे आदींसह भाजपचे कार्यकर्ते व पदाधिकारी उपस्थित होते.