अर्धापूर (जिल्हा नांदेड) - मराठा आरक्षणाची मागणी राज्यभर सध्या ऐरणीवर आहे. या मागणीसाठी खूप मोठी चळवळ निर्माण झाली असून विविध मार्गांनी आंदोलन करण्यात येत आहे.

या आंदोलनात आबालवृद्ध, तरुण, विद्यार्थी, महिला सहभागी झाल्या आहेत. एक राज्यव्यापी आंदोलन सुरू झाले असून या मागणीसाठी आरपारचा लढा सुरू झाला आहे. या आंदोलनात तरुणांचा सहभाग खूप मोठा आहे. या ऐतिहासिक आंदोलनात सहभागी झालेल्या शेलगाव (जिल्हा नांदेड) येथील तरुणाने आपल्या लाडक्या मुलीचे नाव 'आरक्षणा' असे ठेवले आहे.

मराठा समाजाला ओबीसी संवर्गातून आरक्षण देण्याच्या मागणीसाठी राज्यभर विविध मार्गांनी आंदोलन करण्यात येत आहे. आरक्षणाच्या मागणीचा लढा तीव्र झाला असून, या लढ्याला साहित्यीक, विचारवंतांनी पाठिंबा दिला आहे. शेलगाव हे शेतकरी चळवळीसाठी जिल्ह्यात ओळखले जाते.या गावातील नागरिक, तरुण, शेतकरी कामगार या आरक्षणाच्या लढाईंत सहभागी झाले आहेत.

कुटुंबात बाळ जन्माला येण्याआधी त्याच्या नावाविषयी चर्चा सुरू होते.कोणी पुर्वजांची आठवण राहावी यासाठी बाळाचं नाव ठेवात तर कोणी ऐतिहासिक, पौराणिक, विविध प्रकारचे नांव ठेवण्यात येतात.शेलगाव येथील आतम राजेगोरे हा मराठा समाजाला आरक्षण मिळावे म्हणून केल्या काही वर्षांपासून चळवळीत सहभागी आहे.

त्यांचा विवाह गायत्री कंकाळ हिच्याशी दोन वर्षांपूर्वी झाला आहे. तो सध्या उपोषणाला बसला आहे. त्यांना सोमवारी (ता ३०) कन्यारत्न झाले आहे. या बाळाचे नाव काय ठेवावे या विषयावर कुटुंबात खूप मोठी चर्चा झाली. मराठा आरक्षणाच्या मागणीसाठी सुरू असलेल्या आंदोलनाची आठवण राहावी यासाठी त्यांनी मुलीचे नाव 'आरक्षणा' असे ठेवले आहे.

मी गेल्या काही वर्षांपासून आरक्षणाच्या मागणीच्या आंदोलनात सहभागी झालो आहे. या आंदोलनांची आठवण राहावी यासाठी माझ्या मुलीचे नाव आरक्षणा असे ठेवले आहे. शासनाने मराठा समाजाच्या भावना लक्षात घेऊन तातडीने आरक्षण द्यावे अशी मागणी आतम राजेगोरे यांनी केली आहे.