केज (बीड): भारतीय सैन्य दलात सेवेत कार्यरत असलेला जवान सुट्टीवर गावी आला असताना दुचाकीसमोर हरीण आल्याने केज-बीड रस्त्यावर (२३ जून) कदमवाडी-उमरी फाट्यादरम्यान अपघात झाला होता. पुणे येथील मिलिटरी हाॅस्पिटलमध्ये उपचारादरम्यान रविवारी (ता.27) रोजी पहाटेच्या सुमारास आसाराम विष्णू ठोंबरे या सैनिकाचे निधन झाले. तालुक्यातील दहिफळ (वडमाऊली) येथील आसाराम (अशोक) विष्णू ठोंबरे (वय-26) हे आसाम येथे भारतीय सैन्यात कर्तव्यावर होते. परंतू मागच्या आठ दिवसांपूर्वी ते गावाकडे सुट्टीवर आले होते. ते बुधवारी
दुपारी केजहून दहिफळ (वडमाऊली) या आपल्या गावाकडे दुचाकीवर जात असताना केज-बीड रस्त्यावरील कदमवाडी-उमरी फाट्यादरम्यान आले असताना एक हरीण आडवे आल्याने
अपघात झाला. या अपघातात त्यांच्या डोक्याला गंभीर जखम झाली होती.

अपघातानंतर ठोंबरेंना उपचारासाठी बीड येथील एका खाजगी रूग्णालयात दाखल करण्यात येऊन त्यांच्यावर शस्त्रक्रिया करण्यात आली होती. त्यांच्या प्रकृतीत सुधारणा होत असतानाच पुढील उपचारासाठी शनिवारी पुणे येथील मिलिटरी हॉस्पिटलमध्ये हलवण्यात आले होते. मात्र तेथे उपचार सुरू असतानाच रविवारी पहाटे त्यांचे निधन झाल्याचे नातेवाईकांकडून सांगण्यात आले.

आसाराम हे तीन वर्षांपूर्वीच सैन्यात भरती झाले होते. दोन वर्षांपूर्वी त्यांचा विवाह झाला होता. त्यांच्या पश्चात आई-वडील, पत्नी व सात महिन्यांचा मुलगा असा परिवार आहे. आसाराम ठोंबरे या सैनिकाच्या पार्थिवावर सोमवारी दुपारी बारा वाजता दहिफळ या त्यांच्या मूळगावी अंत्यसंस्कार करण्यात येणार असल्याचे सांगण्यात आले. अपघाती निधनाची वार्ता समजताच कुटुंबीयांसह अख्खं दहिफळ (वडमाऊली) गावं गावाच्या सुपूत्राच्या अकाली जाण्याने गावात शोककळा पसरली आहे.