सोयगाव, ता. 26 (जि.औरंगाबाद) ः सोयगावला शासनाच्या अवर्षणप्रवण क्षेत्रातून वगळल्याचे आदेश महसूल आणि कृषी विभागाने जारी केला आहे. यामुळे शासनाच्या निकषाचा शेतकऱ्यांना अडसर ठरला आहे. पावसाच्या सरासरीवरून सोयगावला अवर्षणप्रवणमधून वगळण्यात आल्याने पीक विम्याच्या लाभासाठी जोखीमस्तर कमी होणार असल्याने आणि दुष्काळाच्या मदतीत शासनाची भरीव मदत मिळणार नाही.
सोयगावसह तालुक्‍यात पावसाची सरासरी वार्षिक सरासरीच्या प्रमाणात झाली असल्याचा ठपका लावून जिल्ह्यातून सोयगावला अवर्षणप्रवण क्षेत्रातून वगळण्यात आले आहे.

दरम्यान, यामध्ये गंगापूर, वैजापूर, कन्नड, पैठण, औरंगाबाद, खुलताबाद या तालुक्‍यांचा समावेश करण्यात आला आहे. सोयगावला पावसाने वार्षिक सरासरीच्या अपेक्षित सरासरी गाठल्याचा निकष लावण्यात आलेला आहे. त्यामुळे अवर्षणप्रवण क्षेत्रातून सोयगावला वगळणी करण्यात आली आहे.

पीक विम्याचा जोखीमस्तर होणार कमी

यंदाच्या खरिपाच्या हंगामाची नजर अंदाज आणेवारीची तयारी महसूल आणि कृषी विभागाकडून करण्यात आली आहे. नजर अंदाज आणेवारी घोषित करण्यासाठी पीक कापणी प्रयोग महसूल, कृषी आणि पंचायत समिती विभागांना वाटणी करण्यात आली आहे. यामध्ये नजर अंदाज आणेवारीवरून पीक विम्याचा पहिला निकष ठरविण्यात येणार आहे. अवर्षण प्रवणमधून सोयगावची वगळणी झाल्याने पीक विम्याचा जोखीमस्तर कमी बसेल. त्यामुळे शेतकऱ्यांना भविष्यात पीकविमा मंजूर झाल्यास पीकविम्याची कमी रक्कम हातात मिळणार आहे.

ना कोरडा दुष्काळ ना, ओला दुष्काळ

दरम्यान, एकीकडे शासनाने ठरवून दिलेल्या निकषांवरून पावसाच्या सरासरीवरून सोयगावला अवर्षणप्रवण क्षेत्रातून वगळण्यात आले आहे. दुसरीकडे मात्र अतिपावसाने पिकांची स्थिती चिंताग्रस्त झाली असताना ओल्या दुष्काळाचा निकषही लावण्यात आलेला नाही. त्यामुळे शेतकऱ्यांना ना कोरडा दुष्काळ ना ओला दुष्काळ अशी नामुष्की ओढावली आहे.