लातूर : सहावर्षीय मुलीला खून करून तिच्या वडिलांनी आत्महत्या केल्याची घटना बुधवारी शहरात घडली. येथील मोतीनगर भागात अभय लक्ष्मीनिवास भुतडा (वय ३६) हे पत्नी सुनैना, मुलगी नौव्या (वय ६) हिच्यासह भाड्याच्या घरात राहत होते. त्यांचे याच भागात ‘अवंती नाष्टा सेंटर’ नामक हॉटेल आहे. त्यांची सासरवाडीही मोतीनगरमध्येच आहे.

सुनैना व नौव्या भुतडा या चार दिवसांपूर्वी माहेरी वडील गोविंद मुंदडा यांच्याकडे राहण्यासाठी गेल्या होत्या. अभय भुतडा हे दररोज जेवणासाठी सासरी जात होते. त्यानुसार अभय भुतडा आज सकाळी सासरी गेले. मुलगी नौव्या हिला गुजराती इंग्लिश स्कूलमध्ये सोडतो असे म्हणून तिला घेऊन ते घराबाहेर पडले. सकाळी सव्वादहाच्या सुमारास सासरच्यांनी फोन केला पण अभय यांनी उचलला नाही.

त्यानंतर सुनैना यांनी मुलगी नौव्या हिच्या शाळेत फोन करून विचारणा केली. ‘तिचे वडील तिला शाळेत घेऊन आले होते; पण लगेच परत घेऊन गेले’ असे शाळेतून त्यांना सांगण्यात आले. अभय यांच्या तपासासाठी सासरे मुंदडा हे त्यांच्या घरी गेले. त्यावेळी घराचा दरवाजा आतून बंद होता, प्रतिसादही मिळत नव्हता. घराचा दरवाजा तोडण्यात आला.

घराच्या हॉलमध्ये गळफास लावलेल्या स्थितीत नौव्या तर बाजूलाच अभय भुतडा यांनीही गळफास घेतल्याचे त्यांना दिसले. पोलिसांनी दोघांना शासकीय रुग्णालयात नेले. डॉक्टरांनी तपासून दोघांनाही मृत घोषित केले. अभय भुतडा गेल्या काही महिन्यांपासून आर्थिक अडचणीत होता. यातूनच त्याने मुलगी नौव्या हिचा गळफास देऊन खून केला व स्वतः आत्महत्या केली, अशी फिर्याद मुंदडा यांनी दिली. त्यानुसार खुनाचा गुन्हा नोंद झाला.