हिंगोली : जिल्ह्यामध्ये बँक दरोडा प्रकरणातील आरोपींना पकडून आणखी तीन गुन्हे उघड झाले आहे. या आरोपींकडून यापूर्वी विविध गुन्ह्यांमध्ये वापरलेले पिस्तूल, १२ जिवंत काडतूस, बाराबोरचे ९ जिवंत काडतूस, मोटारसायकल, दोन खंजीर असा मुद्देमाल जप्त करण्यात आला असल्याची माहिती स्थानिक गुन्हे शाखेच्या वतीने बुधवार (ता.१९) देण्यात आली आहे. पोलीस अधीक्षक राकेश कलासागर यांच्या मार्गदर्शनाखाली हिंगोलीच्या स्थानिक गुन्हे (Crime) शाखेने ही कार्यवाही केली आहे. १४ जानेवारी रोजी हिंगोली (Hingoli) जिल्ह्यातल्या वसमत तालुक्यातील आंबाचोंढी येथे ग्रामीण बँकेच्या शाखेवर दिवसाढवळ्या बंदूकधारी चोरट्यांनी दरोडा टाकून गोळीबार करून बँक लुटण्याचा प्रयत्न केला होता. पोलिसांनी चोरट्यांचा पाठलाग करून नागरिकांच्या मदतीने एका शेतातून या दरोडेखोरांना ताब्यात घेतले होते. (Three Accused Arrested For Bank Robbery In Hingoli)

चोरट्यांची सखोल चौकशी केली असता त्यांच्याकडून आणखी तीन गुन्ह्याची उकल झाली आहे. या गुन्ह्यात वापरलेले वरील साहित्य पोलिसांनी जप्त केले आहे. पोलिसांनी केलेल्या कार्यवाहीमुळे चोरट्यांचे चांगलेच धाबे दणाणले आहेत. या कामगिरीबद्दल स्थानिक गुन्हे शाखेच्या पथकाची पोलीस अधीक्षक राकेश कलासागर यांनी कौतुक केले आहे. दरम्यान पोलीस अधीक्षक यांच्या मार्गदर्शनाखाली अपर पोलीस अधीक्षक यशवंत काळे, उपविभागीय पोलीस अधिकारी किशोर कांबळे, पोलीस निरीक्षक उदय खंडेराय, उपनिरीक्षक शिवसांब घेवारे, सहायक पोलीस निरीक्षक सुनील ग़ोपीनवार, श्री. बोधनापोंड, पोलिस उपनिरीक्षक बालाजी पुंड, नितीन केनेकर यांच्यासह बाळापूर व कुरुंदा पोलीस ठाण्यातील कर्मचारी यांनी कारवाई केली आहे.