चाकूर - वीज पडून दोन शेतकऱ्यांचा मृत्यू झाल्याची घटना महाळंगी (ता. चाकूर) येथे रविवारी दुपारी चारच्या सुमारास घडली. झाडे उन्मळल्यामुले घर, काही वाहनांचे नुकसान झाले आहे.

महाळंगी परिसरात दुपारी वादळी वाऱ्यासह पाऊस झाला. यावेळी शिवाजी नारायण गोमचाळे (वय ३५) व ओंकार लक्ष्मण शिंदे (३०) हे शेतात होते. अंगावर वीज पडून दोघांचा जागीच मृत्यू झाला. तहसीलदार नरसिंग जाधव, मंडळ अधिकारी अनुपमा निंबाळकर, तलाठी विष्णू वजिरे यांनी पंचनामा केला. दोघांचे मृतदेह जानवळ येथील आरोग्य केंद्रात पाठविले.

दरम्यान, महाळंगी परिसरात वादळी वाऱ्यामुळे काही झाडे उन्मळून पडली. झाड पडल्यामुळे घराची पडझड झाली. झाड पडल्यामुळे एका ऑटोचेही नुकसान झाले आहे. खांब पडल्यामुळे गावातील वीजपुरवठा खंडित झाला आहे.

शिवणखेड येथे प्रभू रामा कोंपले यांच्या मालकीच्या म्हशीवर बाभळीचे झाड पडले. त्यात ती दगावली. झरी खुर्द येथील गणेश सूर्यवंशी यांची दोन एकर क्षेत्रावरील केळीची बाग वादळाने आडवी झाली. त्यांचेही मोठे नुकसान झाले आहे.