वारंगा फाटा(जि. हिंगोली) : महामार्गावरील खड्डा चुकविताना ट्रेलरचालकाने ब्रेक दाबल्याने वाहन उलटून दोन तुकडे झाले. या वेळी ट्रकमधीलच लोखंडी रूळ अंगावरून गेल्याने चालकाचा मृत्यू झाल्याची घटना हिंगोली - नांदेड राष्ट्रीय महामार्गावर गुरुवारी (ता. सहा) भाटेगाव (ता. कळमनुरी) जवळ घडली.

या बाबत माहिती अशी की, वर्धा येथून ट्रेलर ( एमएच ०६ - एसी ७२६८) हैदराबादकडे अवजड लोखंडी वस्तूंची वाहतूक करीत होता. हा ट्रेलर भाटेगाव परिसरात आला असता महार्मावरील खड्डा चुकविण्याचा प्रयत्नात चालक शे. हमिद शे. आलाद्दिन (वय ३३, रा. आंबेसांगवी, ता. लोहा, जि. नांदेड) यांनी ट्रेलरचे ब्रेक दाबले. त्यामुळे ट्रेलर उलटत सरळ झाला. यामध्ये ट्रेलरचे दोन तुकडे झाले. 

हेही वाचा - बापरे...! फक्त खूनच नाही, तर जाळूनही टाकले

पोलिसांनी घेतली घटनास्थळी धाव

कॅबिनमध्ये असलेले चालक शे. हमिद शे. आलाद्दिन हे कॅबिनच्या बाहेर पडले. मात्र, त्याच वेळी ट्रॉलीमधील लोखंडी पट्याचे रोलर शे. हमिद शे. आलाद्दिन यांच्या अंगावरून गेले. यामध्येच त्यांचा मृत्यू झाला. घटनेची माहिती मिळताच आखाडा बाळापूरचे सहायक पोलिस निरीक्षक रवी हुंडेकर, शेख बाबर, प्रभाकर भेग यांनी घटनास्थळी धाव घेतली. याप्रकरणी नोंद घेण्याची प्रक्रिया सुरू होती.

जीप- ट्रकच्या अपघातात सात जण जखमी

आखाडा बाळापूर : नांदेड- हिंगोली मार्गावरील कुर्तडी पाटीजवळ (ता. कळमनुरी) तवेरा जीप व ट्रकच्या अपघातात जीपमधील सात जण किरकोळ जखमी झाल्याची घटना गुरुवारी (ता. सहा) घडली. या बाबत माहिती अशी की, तवेरा जीप (एमएच ३८- ००८२) नांदेड येथून हिंगोलीकडे येत होती. जीप कुर्तडी पाटीजवळ आली असता हिंगोलीकडे फरशी घेऊन येणाऱ्या ट्रकच्या (जीजे ३६ टी ५१५७) चालकाने अचानक ब्रेक दाबले. त्यामुळे जीप ट्रकला धडकली. यामध्ये जीपमधील सात जण किरकोळ जखमी झाले. याप्रकरणी आखाडा बाळापूर पालिस ठाण्यात सायंकाळपर्यंत नोंद झाली नव्हती.

यावर क्लिक करा - अकराशे एकरांची नोंद असणारी सातबारा पुस्तिका गायब

हिंगोली-नांदेड महामार्ग बनला खड्डेमय

हिंगाेली - नांदेड महामार्गावरून दररोज हजारो वाहने धावतात. मात्र, काही महिन्यांपासून या महामार्गाची दुरवस्था झाली असून जागोजागी खड्डे पडले आहेत. खड्डे चुकविण्याच्या प्रयत्नात अपघात होत आहेत. दोन महिन्यांत चार ते पाच वेळा वाहने उलटल्याच्या घटना घडल्या आहेत. अपघातांच्या घटना घडूनही महामार्गावरील खड्डे बुजविण्याकडे दुर्लक्ष केले जात आहे. महामार्गावरील खड्डे बुजविण्यात यावीत, अशी मागणी केली जात आहे.