जातेगाव (जि. बीड) - मागील १५-२० दिवसापासून गेवराई तालुक्यातील गोदावरी नदी परिसरात तसेच ग्रामीण भागात आणि शहरातील मुख्य वसाहत ठिकाणी ड्रोन रात्र-बेरात्र घिरट्या घालत असल्याने नागरिकात भीतीचे वातावरण निर्माण झाले आहे.

गोदावरी नदीच्या काठावरील पंचाळेश्वर, राक्षसभूवन, सावळेश्वर तसेच गेवराई शहरातील नविन वसाहत आणि ग्रामीण भागातील राजपिंपरी, पांढरवाडी गावखेड्यात मागील १५ दिवसापासून मध्यरात्रीनंतर ड्रोन घिरट्या घालत आहे. मात्र, ड्रोन कोणाचे अन् कशामुळे घिरट्या घालत आहे. याची माहीती उपलब्ध झालेली नाही. मग घिरट्या घालणारे ड्रोन कुणाचे हा एक कुतूहलाचा विषय बनला आहे.

दरम्यान, गेवराई शहरात व ग्रामीण भागात फिरणारे ड्रोन हे पोलीस प्रशासनाचे नसल्याचे सहायक पोलीस निरीक्षक संतोष जंजाळ यांनी सांगीतले. तर काही दिवसापूर्वी सार्वजनिक बांधकाम विभागाचे ड्रोन फिरले असल्याची माहीती असून, मात्र, सद्यपरिस्थितीत फिरणारे ड्रोन महसूल विभागाचे नाही. असे नायब तहसीलदार संजय सोनवणे यांनी सांगीतले.