Umraga Latest Update: धाराशिव जिल्हा मध्यवर्ती बँकेचे माजी अध्यक्ष तथा राष्ट्रवादी काँग्रेस पक्षाचे प्रदेश उपाध्यक्ष प्रा. सुरेश (दाजी) बिराजदार यांना राष्ट्रवादी काँग्रेस पक्ष अजित पवार गटाकडून विधान परिषदेवर संधी मिळण्याची शक्यता राजकीय वर्तुळातून चर्चिली जात आहे. प्रा. बिराजदार निष्ठावंत कार्यकर्ते आहेत.

शिवाय त्यांनी लोकसभा निवडणुकीची तयारी केली होती मात्र ऐनवेळी बदलत्या घडामोडीत त्यांना डावलण्यात आल्याने उपमुख्यमंत्री अजीत पवार यांनी विधान परिषदेवर संधी देण्याचे आश्वासन दिल्याने कार्यकर्त्यांच्या आशा पल्लवित झाल्या आहेत.

राष्ट्रवादी काँग्रेस पक्षाच्या वाट्याला विधान परिषदेच्या तीन जागा तर राज्यसभेच्या दोन जागा येत आहेत, त्यात विधान परिषदेच्या तीन जागांपैकी एका जागेवर धाराशिव येथील लोकसभा निवडणुकीच्या प्रचारादरम्यान जाहीर सभेमध्ये उपमुख्यमंत्री अजित पवार यांनी प्रा. बिराजदार यांना विधान परिषदेवर संधी देण्याची घोषणा केली होती.

धाराशिव लोकसभेसाठी अजित पवार यांनी प्रा. बिराजदार यांना तयारी करण्याची सूचना देत सहा महिन्यापूर्वीच कामाला लावले होते त्यानुसार बिराजदार यांनी मतदारसंघ पिंजून काढला होता. पण राजकीय घडामोडीत आमदार राणा जगजितसिंह पाटील यांच्या पत्नी अर्चना पाटील यांना उमेदवारी देऊन श्री. बिराजदार यांना थांबण्यास सांगण्यात आले. श्री. पवार आदेशाप्रमाणे त्यांनी पक्षाचे एकनिष्ठ पणे कामही केले.

मागील ४० वर्षांपासून राष्ट्रवादी काँग्रेस पक्षाशी एकनिष्ठ राहुन माजी आमदार (कै.) भाऊसाहेब बिराजदार यांचा राजकीय वारसा समर्थपणे चालवणाऱ्या तसेच जिल्ह्यातील राष्ट्रवादीवर आलेल्या संकट समयी खंबीरपणे पक्षाशी साथ देत पक्षाला उभारी दिली. अडचणीत आलेली जिल्हा बँक वाचवण्यासाठी केलेले यशस्वी प्रयत्न.

धाराशिव जिल्ह्यामध्ये बेरोजगार व्यवसायिक यांच्यासाठी उभारलेले भाऊसाहेब बिराजदार बँक तसेच समुद्राळ येथे उभारलेला भाऊसाहेब बिराजदार सहकारी साखर कारखाना यामुळे चार तालुक्यातील ऊस उत्पादक शेतकऱ्यांना होणारा मोठा फायदा व पक्ष अडचणीत असताना पक्षाची घेतलेली जबाबदारी समर्थपणे पार पडल्याने प्रा. बिराजदार यांना विधान परिषदेवर संधी मिळावी असे कार्यकर्त्यांना वाटत आहे.