शहापूर (ठाणे) : शहापुरातील एका कोरोनाबाधित रुग्णाशी संपर्क आला म्हणून विलगीकरण कक्षात ठेवलेल्या सर्व ११ जणांचे अहवाल निगेटिव्ह आल्याचे समोर आले आहे. तहसीलदार नीलिमा सूर्यवंशी यांनी ही माहिती दिल्याने शहापूरकरांनी काही अंशी सुटकेचा निश्वास सोडला आहे. 

क्लिक करा : मुंबईतील रुग्णालयेच आजारी पडताहेत का? 

ठाणे जिल्ह्यातील कोरोनाचा एकही रुग्ण नसलेल्या शहापूर तालुक्यात शुक्रवारी कोरोनाचा पहिला रुग्ण आढळून आला होता. 67 वर्षीय हा रुग्ण पॉझिटिव्ह असल्याचे शहापूरच्या तहसीलदार नीलिमा सूर्यवंशी यांनी जाहीर केले. या 67 वर्षीय रुग्णाला दम्याचा त्रास होत असल्याने त्याला प्रथम शहापूरच्या खासगी रुग्णालयात दाखल करण्यात आले होते.

त्यानंतर संबंधित रुग्णाला ठाणे येथील होरिझन या रुग्णालयात 7 एप्रिलला दाखल करण्यात आले. या रुग्णाची ठाणे शहराच्या पश्चिम भागातील एका खासगी लॅबमध्ये कोरोनाची चाचणी केली असता त्यांचा अहवाल पॉझिटिव्ह आला. 

क्लिक करा : मातोश्री पाठोपाठ वर्षाच्या दारावरही कोरोनाची ठकठक 

दरम्यान, या रुग्णाच्या संपर्कात आलेल्या ११ जणांना विलगीकरणात ठेवण्यात आले होते. यापैकी 7 जण भिवंडी येथे तर इतर 4 जणांना होम क्वारंटाईन करण्यात आले होते. या 11 जणांपैकी 4 जणांची कोरोना चाचणी निगेटिव्ह आली होती. तर उर्वरित 7 जणांच्या चाचणीचे अहवाल बुधवारी (ता. 22) प्राप्त होणार होते. त्यानुसार 7 जणांचे अहवाल निगेटिव्ह आल्याची माहिती तहसीलदार नीलिमा सूर्यवंशी यांनी दिली.