मुंबई : पश्चिम रेल्वेवर गेल्या दोन महिन्यात विना तिकिट प्रवास करणार्‍यांकडून ३८ कोटी ३ लाखांचा दंड वसूल करण्यात आला आहे. यामध्ये एसी लोकलमधून (AC Local) प्रवास करणाऱ्या साडे आठ हजार फुकट्या प्रवाशांवर कारवाई करून त्यांच्याकडून तब्बल २९ लाखांचा दंड वसूल करण्यात आल्याचे पश्चिम रेल्वेकडून (Western Railway) सांगण्यात आला आहे.

तिकिट खिडक्यांवरील गर्दी, सुट्ट्या पैशांची चणचण तर कधीकधी उशिर होत असल्याने प्रवासी विनातिकिट प्रवास करतात. अशा प्रवाशांवर रेल्वेच्या टिसीद्वारे कारवाई केली जाते. उपनगरीय लोकलसह लांब पल्याच्या मेल-एक्सप्रेसमध्ये देखील विना तिकिट प्रवासी प्रवास करतात. पश्चिम रेल्वेच्या तिकीट (Railway Ticket) तपासणी पथकाने एप्रिल ते मे २०२४ या दोन महिन्यांत अनेक तिकीट तपासणी मोहिमेचे आयोजन केले होते.

यात ३८ कोटी ०३ लाखांचा दंड विना तिकिट प्रवाशांकडून वसूल करण्यात आला. मे २०२४ मध्ये बुक न केलेल्या सामानाच्या प्रकरणांसह २.८० लाख तिकीटविहीन/अनियमित प्रवाशांचा शोध घेऊन १७.१९ कोटी दंड वसूल करण्यात आला. तसेच, मे महिन्यात, पश्चिम रेल्वेने मुंबई उपनगरी विभागातील १ लाखांहून अधिक प्रकरणे शोधून ४.७१ कोटी रुपयांचा दंड वसूल केला.

दरम्यान, एसी लोकल गाड्यांमध्ये अनधिकृत प्रवेश रोखण्यासाठी वारंवार तिकीट तपासणी मोहीम राबवली जाते. या मोहिमेचा परिणाम म्हणून एप्रिल आणि मे मध्ये सुमारे ८,५०० अनधिकृत प्रवाशांना दंड आकारण्यात आला आहे, ज्याद्वारे तब्बल २९ लाखांचा दंड वसूल करण्यात आल्याचे पश्चिम रेल्वेकडून सांगण्यात आले.