स्वातंत्र्य दिनाच्या अमृतमोहत्सव सोहळ्यादिवशीच मंत्रालयासमोर अंगावर रॉकेल टाकत शेतकऱ्याने आत्मदहन करण्याचा प्रयत्न केला. यावेळी मुख्यमंत्री उद्धव ठाकरे भाषण संपवून निघाले होते. परिस्थितीचं गांभिर्य ओळखून पोलिसांनी वेळीच त्या शेतकऱ्याला रोखत मोठी दुर्घटना टाळली. मिळालेल्या माहितीनुसार, आत्मदहनाचा प्रयत्न करणारा शेतकरी जळगावचा आहे. या शेतकऱ्याला पोलिसांनी ताब्यात घेतलं असून चौकशी सुरु आहे.

रविवारी सकाळी मंत्रालयात मुख्यमंत्र्यांच्या हस्ते ध्वजारोहण करण्यात आलं. त्यानंतर काही वेळानंतर शेतकऱ्यांनी आत्मदहनाचा प्रयत्न केल्याचा हा प्रकार घडल्यानं खळबळ उडाली. या शेतकऱ्यानं असं का केलं? याबाबत अद्याप कोणतीही माहिती मिळू शकलेली नाही.

एबीपी माझाने दिलेल्या वृत्तानुसार, या शेतकऱ्याचं नाव सुनील गुजर असं आहे. मका आणि सोयाबीन व्यवहारात आडकाठी होत असल्याचं या शेतकऱ्यांचं म्हणणं आहे आणि यातूनच या शेतकऱ्याने टोकाचं पाऊल उचलत मंत्रालय परिसरात आत्मदहनाचा प्रयत्न केला. मंत्रालयात ध्वजारोहण करून मुख्यमंत्री बाहेर पडल्यानंतर, वाहतूक सुरळीत झाली व सुरक्षा व्यवस्थेत थोडी शिथिलता आल्यानंतर शेतकऱ्याने मंत्रालयाच्या प्रवेशद्वाराजवळ स्वतःच्या अंगावर रॉकेल टाकून आत्मदहनाचा प्रयत्न केला. परिस्थितीचं गांभिर्य पाहून उपस्थित पोलिसांनी त्या शेतकऱ्याला रोखलं आणि अनर्थ टळला.