गेल्या काही दिवसांपासून मुंबईची लाईफलाईन म्हटल्या जाणाऱ्या लोकल सेवा विस्कळीत होत आहेत. आता नुकत्याच हाती आलेल्या माहितीनुसार नेरुळ स्थानकावर तांत्रिक बिघाड झाला असून, त्यामुळे हार्बर लाइनवरील अप-डाऊन सेवा पहाटेपासून ठप्प झाली आहे.

दरम्यान हार्बर लाईनवरून पनवेल आणि ठाण्याच्या दिशेने धावणाऱ्या लोकलही यामुळे विस्कळीत झाल्या आहेत. ही सेवा सुरळीत होण्यासाठी आणखी दोन तास लागण्याची शक्यता आहे.

मुंबई आणि आसपासच्या परिसरातील नोकरदार वर्ग पहाटेपासूनच कामाच्या ठिकाणी वेळेत पोहचण्यासाठी लोकलने प्रवास करत असतो. मात्र, नेरुळ स्टेशनवर तांत्रिक बिघाड झाल्याची कोणतीही माहिती रेल्वे प्रशासनाकडून देण्यात न आल्याने चाकरमान्यांची मोठी गैरसोय झाली आहे. इतकेच नव्हे तर अनेकांनी याबाबत संताप व्यक्त केला आहे.

पहाटे साडेपाच वाजता ओव्हरहेड वायर तुटल्याने पनवेल ते सीएसएमटीकडे जाणाऱ्या अनेक लोकल गाड्या गेल्या दोन तासांपासून विस्कळीत झाल्या आहेत. यासह पनवेलहून ठाण्याकडे जाणारी वाहतूकही विस्कळीत झाली आहे. त्यामुळे प्रवाशांचे प्रचंड हाल होत आहेत.

पनवेल, बेलापूर, वाशी रेल्वे स्थानकावर प्रवाशांची गर्दी असते. सेवा सुरू होण्यासाठी आणखी दोन तास लागण्याची शक्यता आहे.

सध्या वाशी ते सीएसएमटी आणि वाशी ते ठाणे या मार्गावर लोकल सेवा सुरू आहे. मात्र, पनवेल ते वाशी आणि ठाणे ते पनवेल रेल्वे सेवा विस्कळीत झाली आहे. सध्या रेल्वे प्रशासन तांत्रिक बिघाड दूर करण्यात प्रयत्न करत आहेत.