मुंबई : शिवसेनेतून बंड केल्यानंतर भाजपसोबत सरकार स्थापन करुन मुख्यमंत्री बनलेल्या एकनाथ शिंदे यांच्या बंडाबाबत ठाकरे गटाचे आमदार आदित्य ठाकरे यांनी मोठा गौप्यस्फोट केला आहे. त्यामुळं आता नव्या चर्चेला तोंड फुटण्याची शक्यता आहे. (Aditya Thackeray speaks secret regarding Eknath Shinde rebellion)

शिंदेंच्या बंडाची कुणकुण आम्हाला लागली होती. याबाबत त्यांच्याकडं आम्ही विचारणाही केली होती, असं आदित्य ठाकरे यांनी म्हटलं आहे. त्याचबरोबर हे बंड नसून गद्दारी असल्याचं सांगताना त्यांनी आमच्या पाठित सुरा खुपसला अशी संतप्त प्रतिक्रिया आदित्य ठाकरे यांनी दिली आहे. लोकमतच्या एका कार्यक्रमात त्यांनी हा खुलासा केला आहे.

शिंदेंच्या बंडाची जी कुणकूण लागली होती त्याचा सविस्तर तपशील सांगताना आदित्य ठाकरे म्हणाले, "मी दावोसला गेलो होतो त्याचवेळी तत्कालीन मुख्यमंत्री माझे वडील उद्धव ठाकरे यांच्यावर मानेच्या दुखण्यामुळं दोन शस्त्रक्रिया झालेल्या होत्या. त्याचवेळी एकनाथ शिंदेंच्या मनात वेगळचं काहीतरी सुरु होतं. शिवसेनेतून बाहेर पडल्यानंतर मुख्यमंत्री होता येईल का? याची बहुतेक ते चाचपणी करत होते, याची कुणकुण आम्हाला लागली होती. त्यामुळं तुम्ही बंडखोरीचा विचार करत आहात का? अशी विचारणाही उद्धव ठाकरेंनी त्यांच्याकडं २० मे रोजी केली होती.

दरम्यान, शिंदेंच्या बंडाला बंड न म्हणता ही गद्दारी असल्याची संतप्त भाष्य आदित्य ठाकरेंनी केलं आहे. त्यांनी आमच्या पाठीत सुरा खुपसला. स्वतःला विकलेल्या लोकांना थांबवून करणार काय? स्वतःचा आत्मा विकलेल्या लोकांकडून दुसरी कुठली अपेक्षा करणार असंही यावेळी आदित्य ठाकरे म्हणाले.