Latest Crime News: सायबर फसवणूक झालेल्या गुजरातच्या व्यक्तीने वेळेत केलेल्या तक्रारीमुळे त्याचे पैसे पोलिसांनी सुरक्षित केले. मात्र मधल्या काही मिनिटांत या पैशांच्या सहाय्याने मुंबईतील सराफा व्यवसायिकाला मात्र चूना लागला. सायबर भामट्यांची फसवणुकीची ही नवी पद्धत विमानतळ पोलीस ठाण्यात दाखल एका गुन्ह्याद्वारे उजेडात आले आहे.

अंधेरीतील एका सराफा दुकानात सकाळी दागिने पसंत केले आणि संध्याकाळी विकत घेतले. या व्यक्तीने जगदीश पटेल या भावाच्या नावे बील बनविण्यास सांगितले. पुरव्यादाखल त्याने जगदीशचे आधार कार्ड दाखविले.

या व्यक्तीने सराफा दुकानाच्या नावे असलेल्या बँक खात्यावर दागिन्यांचे साडेतीन लाख रुपये भरले. दागिने घेऊन ही व्यक्ती निघून गेल्यावर काही तासांनी या बँक खात्यात जमा झालेले पैसे आपोआप अन्य खात्यात वळते झाले.

हे समजताच सराफा व्यापाऱ्याने बँकेत धाव घेतली. तेव्हा ही रक्कम गुजरातच्या विनय पांडे या व्यक्तीच्या सायबर फसवणूक करून ती सराफा दुकानाच्या खात्यात वळती करून दागिने खरेदी करण्यात आले होते.

पांडे यांनी तीन तासांच्या आत फसवणुकीची बाब कळविल्याने सायबर पोलिसांनी ती बँकेच्या नोडल अधिकाऱ्याकरवी रोखली आणि पांडे यांच्या खात्यात पुन्हा वळती केली, अशी माहिती बँकेने व्यापाऱ्याला दिली.