मुंबई - अंधेरीच्या गोखले ब्रीजच्या ईस्ट वेस्ट कनेक्टिव्हिटीच्या कामाचे कंत्राट हे ए बी इन्फ्राबिल्ड या कंपनीला मिळाले. परंतु काम सुरू करण्यासाठी अद्यापही कार्यादेश देण्यात आलेले नाहीत. गोखले ब्रीजच्या पालिकेच्या अखत्यारीतील कामासाठीचे कार्यादेश येत्या आठवड्याभरात अपेक्षित आहेत. रेल्वेकडूनही ब्रीज तोडण्यासाठीच्या निविदेची प्रक्रिया सुरू आहे. त्यानुसार रेल्वेही कंत्राटदार निश्चित करण्याच्या मार्गावर आहे.

गोखले ब्रीजचा रेल्वेच्या अखत्यारीतील भाग हा पश्चिम रेल्वेला तोडून देण्याची जबाबदारी आहे. त्यासाठी जानेवारीत काम सुरू होईल असे अपेक्षित आहे. परंतु या सर्व कामासाठी पश्चिम रेल्वेला ब्लॉकही घ्यावे लागतील. रेल्वेच्या कामानंतर पालिकेचे काम प्रत्यक्षात सुरू होणार आहे. आणखी आठवड्याभरात आम्ही गोखले ब्रीजच्या कामासाठी वर्क ऑर्डर देऊ अशी माहिती मुंबई महापालिकेचे अतिरिक्त आयुक्त पी वेलरासू यांनी दिली. या कामामध्ये प्री फॕब्रिकेशनचे काम तसेच रेल्वेच्या कामानंतर त्याठिकाणी कास्टिंगसह गर्डर लॉंच करणे हे पालिकेचे मुख्य काम असणर आहे. या कामासाठी पालिकेने ८७ कोटी रुपयांची निविदा प्रक्रिया सुरू केली होती.

पश्चिम रेल्वेच्या अखत्यारीतील ९० मीटरच्या ब्रीजच्या तोडकामाला काही कंपन्यांनी निविदा दाखल केल्या आहेत. रेल्वेने या कामासाठी १७ कोटी रुपयांची तरतुद केली होती. या कामासाठी एका कंपनीने ११ कोटी तर दुसर्‍ कंपनीने १२ कोटी रुपयांची बोली लावली आहे. पालिकेने पश्चिम रेल्वेकडे या रकमेचा भरणा याआधीच केला आहे.