मुंबई - केईएम रुग्णालयाच्या परिसरात १०३ इमारती आहेत. परंतु नियोजना अभावी योग्य रित्या रुग्ण सेवा करणे शक्य होत नाही. त्यामुळे केईएम रुग्णालयाचा विस्तार करणे गरजेचे असून यासाठी सल्लागाराची नियुक्ती करण्यात यावी, अशी मागणी करणारे पत्र शिवसेना उद्धव बाळासाहेब ठाकरे पक्षाचे माजी नगरसेवक सचिन पडवळ यांनी अतिरिक्त आयुक्त डॉ सुधाकर शिंदे यांना दिले आहे.

परळ येथील केईएम रुग्णालयात देशातून लाखो रुग्ण हे उपचार घेण्यासाठी येत असतात. रुग्णालय परिसरात लहान-मोठ्या जवळपास १०३ इमारती आहेत. या इमारतींची डागडुजी करूनच पूर्ववत केल्या जात आहेत. त्यामुळे रुग्णांना उत्कृष्ट सेवा देणे शक्य होत नाही.

दर्जेदार रुग्ण सेवा देण्यासाठी प्रशासनाने संपूर्ण जागा विस्तार करण्यासाठी सल्लागाराची नियुक्ती करावी. योग्यरित्या आखणी करुन घेतल्यास भविष्यात नियोजनबद्ध इमारती बांधून रुग्णांना अधिकाधिक सोईस्कर सेवा देणे प्रशासनास शक्य होईल, असे पडवळ यांनी पत्रात नमूद केले आहे.

अतिरिक्त आयुक्त डॉ सुधाकर शिंदे यांनी यापूर्वी राज्य सरकारच्या वैद्यकीय क्षेत्रात उत्कृष्ट काम केलेले आहे. त्यामुळे त्यांना या क्षेत्राची संपूर्ण माहिती आहे. त्यामुळे त्यांनी या विषयी जातीने लक्ष देत दर्जेदार रुग्ण सेवेसाठी प्रयत्न करावे, असेही पडवळ यांनी पत्रात नमूद केले आहे.