मुंबई : रिपब्लिक भारतचे अर्णब गोस्वामी यांना पुन्हा मुंबई पोलिसांनी समन्स बजावून चौकशीला उपस्थित राहण्यासाठी सांगितले आहे. धार्मिक भावना दुखावल्याप्रकरणी पायधुनी पोलिस ठाण्यात हा गुन्हा दाखल करण्यात आला होता. वांद्रे येथे जमलेल्या मजुरांच्या गर्दीला धार्मिक रंग देण्याचा प्रयत्न केल्याचा आरोप त्यांच्यावर आहे.

रझा अकादमीचे सचिव इरफान शेख यांच्या तक्रारीवरून हा गुन्हा दाखल करण्यात आला आहे. 29 एप्रिलला  गोस्वामी यांनी वांद्रे रेल्वे स्थानकाजवळील झालेली गर्दी ऐवजी एका धार्मिक स्थळाजवळ ही गर्दी झाल्याचा दावा केला होता. तसेच विशेष समुदायाचे नागरीकच का गर्दी करतात, अशा दावा केला होता. त्यामुळे या प्रकरणाला धार्मिक रंग देऊन धार्मिक भावना दुखावल्याचा आरोप तक्रारदार यांनी केला आहे.

मोठी बातमी - धक्कादायक! मुंबई महापालिका उपायुक्तांचं कोरोनानं निधन...

त्यानंतर त्यांनी याप्रकरणी दक्षिण मुंबईतील पायधुनी पोलिस ठाण्यात तक्रार केली होती. त्यामुळे दोन समाजात तेढ निर्माण करण्याचा प्रयत्न त्यांनी केल्याचा आरोप तक्रारदाराने केला आहे. याप्रकरणी पोलिसांनी भादंवि कलम 153, 153 (अ), 295 (अ), 500, 505 (2), 511, 120 (ब) 505 (1) (ब) (क) अंतर्गत गुन्हा दाखल करण्यात आला आहे. गोस्वामी यांच्यासह रिपब्लिक भारत वृत्तवाहनीच्या मालकांविरोधातही गुन्हा दाखल करण्यात आला होता.

मोठी बातमी - गलथान कारभार ! कुठे कोरोना रुग्ण गायब, कुठे कोरोना रुग्णाचा मृतदेह गहाळ, यावर महापौर किशोरी पेडणेकर म्हणतात...

याप्रकरणी चौकशीसाठी उपस्थित राहण्यासाठी गोस्वामी यांना समन्स पाठवण्यात आला आहे. पायधुनी पोलिस ठाण्याचे पोलीस निरीक्षक सुरेश गायकवाड हे या प्रकरणी तपास करणार आहेत. त्यामुळे गोस्वामी यांनी पायधुनी पोलिस ठाण्यात बुधवारी सकाळी 11 वाजता तपास अधिकारी गायकवाड यांच्यासमोर चौकशीसाठी हजर राहावे, असे समन्समध्ये  म्हटले आहे. अर्णब गोस्वामी यांना याआधीही एन.एम जोशी मार्ग पोलिसांनी समन्स बजावला होता. त्यावेळी तब्बल 12 तास त्यांची चौकशी करण्यात आली होती.

Arnab Goswami summoned by Mumbai Police to appear before Pydhonie police station