Mumbai Aurthur Road Jail: अण्णा भाऊ साठे महामंडळ गैरव्यवहार प्रकरणामध्ये तुरुंगात शिक्षा भोगत असताना आर्थर रोड कारागृहाच्या अधीक्षकांना व डॉक्टरला शिवीगाळ, धमकी दिल्याप्रकरणी माजी आमदार रमेश कदम यांच्याविरोधात गुन्हा दाखल करण्यात आला आहे. या प्रकरणातील मुख्य तक्रारदार व तत्कालीन कारागृह वैद्यकीय अधिकारी राहुल घुले यांनी आपली साक्ष फिरवली असून, त्यांना न्यायालयाने आज फितुर घोषित केले. मुख्य तक्रारदारच फितुर झाल्याने माजी आमदार कदम यांच्या सुटकेचा मार्ग सुकर होण्याची चिन्हे आहेत.

माजी आमदार रमेश कदम हे लोकशाहीर अण्णा भाऊ साठे महामंडळाच्या अध्यक्षपदी असताना त्यांनी बोगस लाभार्थी दाखवून शेकडो कोटींचा घोटाळा केला. याप्रकरणी रमेश कदमांसह एकूण १२ जणांना अटक करण्यात आली; तर राष्ट्रवादी काँग्रेसने त्यांना याप्रकरणी पक्षातून निलंबितदेखील केले. (Latest Marathi News)

आर्थर रोड तुरुंगात शिक्षा भोगत असताना कदम यांनी २४ फेब्रुवारी २०१६ रोजी तुरुंग अधीक्षक आणि डॉक्टरला शिवीगाळ केली होती. जे. जे. रुग्णालयात जाण्यासाठी गाडी उपलब्ध नसल्याने शिवीगाळ केल्याचा कदम यांच्यावर आरोप असून, एन. एम. जोशी मार्ग पोलिस ठाण्यात याप्रकरणी गुन्हा दाखल करण्यात आला होता. मुंबई सत्र न्यायालयाच्या विशेष पीएमएलए कोर्टात या खटल्यावर न्यायाधीश राहुल रोकडे यांच्यासमोर सुनावणी झाली.

एफआयआर आणि तक्रारदाराने दिलेली साक्ष यात तफावत आहे. तत्कालीन पोलिस अधीक्षक भारत भोसले यांच्या सांगण्यावरून डॉक्टरांकडून तक्रार नोंदवण्यात आली होती. आता मात्र या तक्रारदाराने त्याची साक्ष बदलल्याचे निदर्शनास येताच या प्रकरणातील तत्कालीन पोलिस अधीक्षक भारत भोसले आणि सहवैद्यकीय अधिकारी यांना साक्षीदार म्हणून बोलावण्याचा निर्णय न्यायधीशांनी घेतला व या प्रकरणावरील सुनावणी १५ जानेवारीर्यंत तहकूब केली. (Latest Marathi News)