मुंबई : कोरोनाचे संकट आणि लॉकडाऊनमुळे हजर न राहू शकणाऱ्या कामगारांना बेस्ट प्रशासनाने मेमो देण्यास सुरुवात केली आहे. अत्यावश्‍यक सेवेसाठी मनुष्यबळाची गरज असल्याने कामगारांना तातडीने रुजू होण्याचे आदेश प्रशासनाने दिले आहेत. या आदेशांचे उल्लंघन झाल्यास कामगारांवर कारवाई केली जाणार आहे. 
बेस्ट उपक्रमाचे अनेक कामगार पालघर, अंबरनाथ, कर्जत, कसारा या भागांत राहतात. लोकल सेवा बंद असल्याने बेस्ट आगारांत पोहोचायचे कसे, असा प्रश्‍न आहे. त्यात प्रशासनाने मेमो पाठवण्यास सुरुवात केल्यामुळे काय करायचे, हे या कामगारांना समजेनासे झाले आहे. लॉकडाऊन जाहीर झाल्यानंतर कामगारांच्या वेतनात कपात करू नये अथवा त्यांना काढू टाकू नये, असे केंद्र सरकारने स्पष्ट केले आहे. या पार्श्‍वभूमीवर बेस्ट उपक्रमाने कामगारांना नोटिसा दिल्याबद्दल आश्‍चर्य व्यक्त केले जात आहे. 

मुंबईतील महत्वाच्या बातम्या वाचण्यासाठी येथे क्लिक करा
 

अत्यावश्‍यक सेवेसाठी हजर होणे बंधनकारक असल्याचे उपक्रमाने कामगारांना पाठवलेल्या मेमोमध्ये नमूद केले आहे. कामावर रुजू न झाल्यास कायदेशीर कारवाई करण्याचा इशाराही देण्यात आल्यामुळे अनेक कामगारांच्या पायाखालील जमीन सरकली आहे. सध्या बेस्ट उपक्रमाकडून लांब राहणाऱ्या कामगारांसाठी बससेवा पुरवली जाते. परंतु, अधिक अंतरावर राहणाऱ्या कामगारांना या सेवेचा लाभ घेणे अशक्‍य होत आहे. त्यामुळे कारवाईच्या इशाऱ्यामागील कारण समजत नाही, असे कामगारांचे म्हणणे आहे. 

अधिक बातम्यांसाठी "ईपेपर" वाचा।
 

बससेवा पुरवा 
प्रवासाचा अन्य पर्याय नसल्याने कामावर हजर कसे राहायचे, या कामगारांच्या सवालावर बेस्ट प्रशासनाकडे काहीही उत्तर नाही. बससेवा पुरवल्यास आम्ही कामावर येऊ, असे कामगारांचे म्हणतात. बेस्ट कामगारांना पुरेशा सोईसुविधा देण्याऐवजी मेमो देणे योग्य नसल्याची प्रतिक्रिया बेस्ट कामगार सेनेचे कार्याध्यक्ष ऍड्‌. उदय आंबोणकर यांनी दिली आहे.

Best governance penalty for non-working workers