मुंबई: महाराष्ट्रात गेले काही महिने अनेक खळबळजनक घटना घडत आहेत. सर्वप्रथम उद्योगपती यांच्या घराबाहेर स्फोटकांनी भरलेली कार सापडली. नंतर कारचा मालक मनसुख हिरेन याची हत्या झाली. या प्रकरणांमध्ये वादग्रस्त पोलीस अधिकारी सचिन वाझेला अटक झाली. त्याचदरम्यान मुंबईचे माजी आयुक्त परमबीर सिंह यांनी मावळते गृहमंत्री अनिल देशमुखांवर १०० कोटींच्या खंडणीबद्दलचा लेटरबॉम्ब टाकला. तो प्रकरण ताजं असतानाच आज सचिन वाझेने NIAला दिलेल्या पत्रात शिवसेनेचे अनिल परब यांच्यावर खंडणी मागण्याचे आरोप करण्यात आले. या आरोपांनंतर परब यांनी पत्रकार परिषद घेऊन शिवसेनाप्रमुख बाळासाहेब ठाकरे यांच्या शपथेवर आपल्यावरील आरोप खोटे असल्याचं सांगितले. याच मुद्द्यावरून भाजपने परब यांची खिल्ली उडवली.

"सचिन वाझेची चौकशी करा पण..."; न्यायालयाचे CBIला निर्देश

"सचिन वाझेने माझ्यावर लावलेले दोन्ही आरोप धादांत खोटे आहेत. मी बाळासाहेबांचा शिवसैनिक आहे. माझ्यावर खंडणीचे संस्कार नाहीत. मी बाळासाहेबांची आणि माझ्या दोन्ही मुलींची शपथ घेउन सांगतो की हे सारं खोटं आहे", असं अनिल परब म्हणाले. यावरून भाजपचे अतुल भातखळकर यांनी परबांवर खोचक टीका केली. "आरारा... काय वेळ आली आहे अनिल परब यांच्यावर... त्यांना कोणी तरी सांगा, ह्याच्या त्याच्या शपथा घेऊन न्यायालयातून सुटका होत नसते. तुम्हीही दिल्लीत जाऊन एखादा वकील गाठा", अशी खिल्ली उडवणारं ट्वीट भातखळकरांनी केलं.

"बाळासाहेब ठाकरे आणि माझ्या दोन मुलींची शपथ घेऊन सांगतो..."

सचिन वाझेचा 'लेटरबॉम्ब'

'जुलै-ऑगस्ट २०२० मध्ये अनिल परब यांनी शासकीय बंगल्यावर मला बोलावलं. डीसीपींच्या बदल्या होण्याच्या चार दिवस आधी परब यांनी बोलावलं होतं. सुरूवातीला SBUTबद्दलच्या तक्रारीची चौकशी करण्यास सांगितली आणि नंतर चौकशी रोखण्यासाठी SBUTच्या विश्वस्तांकडून ५० कोटी रुपये मागितले. हे काम करण्यास मी असमर्थता दर्शवली होती. जानेवारी २०२१ मध्येही परब यांनी मला पुन्हा शासकीय बंगल्यावर बोलवलं. बृहन्मुंबई महापालिकेच्या यादीतील काही ठेकेदारांची चौकशी करण्यास मला सांगण्यात आलं. अशा ५० ठेकेदारांकडून २ कोटी रुपये वसूल करण्यास त्यांनी मला सांगितलं होतं. अज्ञात तक्रारींच्या आधारावर या प्रकरणाची चौकशी सुरू होती. ठेकेदारांविरोधात CUIने केलेल्या तपासातून काहीच निष्पन्न झालं नाही', असे आरोप वाझेने अनिल परब यांच्यावर केले आहेत.