मुंबई : शिवसेना-भाजप युती तुटणे आणि शिवसेना पक्ष फुटणे या दोन्ही घटनांमागच्या इतिहासावरून हे दोन्ही पक्ष हातघाईवर येऊ लागले आहेत. उपमुख्यमंत्री देवेंद्र फडणवीस यांच्यावर एका दैनिकाच्या अग्रलेखातून केलेल्या टीकेनंतर शनिवारी भाजप आणि ठाकरे गट आमनेसामने आले.

भाजपच्या कार्यकर्त्यांनी मुंबईत विविध ठिकाणी निदर्शने केली. भाजपला प्रत्युत्तर देण्यासाठी शिवसैनिकही रस्त्यावर उतरले. दरम्यान,खासदार अनिल देसाई, आमदार अजय चौधरी, माजी नगरसेवक, पदाधिकारी व कार्यकर्त्यांनी सामना कार्यालयाबाहेर मोठी गर्दी करत जागता पहारा दिला. त्यामुळे मुंबईत काही भागात तणावाची स्थिती होती.

उपमुख्यमंत्री देवेंद्र फडणवीस यांनी दोन दिवसांपूर्वी शिर्डी येथे झालेल्या ‘शासन आपल्या दारी’ या कार्यक्रमात ‘‘मी पुन्हा येणारच होतो, पण काहींनी बेइमानी केली. मात्र जेव्हा आलो तेव्हा त्यांचा अख्खा पक्षच घेऊन आलो,’’ असा टोला हाणत ठाकरे गटाच्या जखमेवर मीठ चोळले होते.

त्याला प्रत्युत्तर देताना संजय राऊत यांनी फडणवीस यांच्यावर जळजळीत भाषेत कोरडे ओढले. संजय राऊत यांची बोचरी टीका जिव्हारी लागल्याने भाजपचे कार्यकर्ते आज रस्त्यावर उतरले. मंत्री मंगलप्रभात लोढा यांनी तर संजय राऊत यांची खासदारकी रद्द करण्याची मागणी केली आहे.

भाजपच्या नरिमन पॉइंट येथील कार्यालयाबाहेर कार्यकर्त्यांकडून खासदार संजय राऊत यांच्याविरोधात घोषणाबाजी केली. तसेच वृत्तपत्राची जाळपोळ करत, निषेध नोंदविण्यात आला. पोलिसांनी भाजप कार्यकर्त्यांची या वेळी धरपकड करत त्यांना ताब्यात घेतले.

आमदार आशिष शेलार यांनी ‘सामना’च्या कार्यालयावर धडक देण्याचा इशारा दिला. तर, अनुचित प्रकार टाळण्यासाठी शिवसैनिक रस्त्यावर आले आहेत. भाजपने आततायीपणा केल्यास शिवसेना स्टाइल उत्तर देऊ, असा इशारा या वेळी शिवसैनिकांनी दिला.