मुंबई : ‘‘आपल्या अहंकारापायी ज्यांनी बाळासाहेबांचे विचार विकले, त्यांच्या विचारांना तिलांजली दिली, ज्या काँग्रेसला वंदनीय बाळासाहेबांनी कधीच जवळ केले नाही, त्या काँग्रेसला सत्तेच्या मोहापायी आणि खुर्चीसाठी उद्धव ठाकरे यांनी कडेवर घेतले. निवडणूक एकाबरोबर जिंकल्या आणि सरकार दुसऱ्यासोबत स्थापन केले. यांच्या अहंकारामुळे राज्य मागे गेले. जी अवस्था अहंकारी रावणाची झाली, तीच अवस्था यांची होईल,’’ अशी टीका मुख्यमंत्री एकनाथ शिंदे यांनी मंगळवारी येथे केली. सत्तेच्या लालसेपोटी ज्या लोकांनी बाळासाहेबांच्या विचारांना तिलांजली दिली त्यांना प्रभू श्रीराम सुबुद्धी देवो, असा टोलाही त्यांनी लगावला.

शिवसेनाप्रमुख बाळासाहेब ठाकरे यांच्या जयंतीनिमित्त एकनाथ शिंदे यांनी मंगळवारी बाळासाहेब भवन येथे बाळासाहेबांच्या प्रतिमेला अभिवादन केले. त्यानंतर पत्रकारांशी बोलताना शिंदे म्हणाले, ‘‘राज्याच्या हितासाठी आणि जनतेच्या कल्याणासाठी आम्ही आधीचे सरकार उलथवून लावून जनतेचे सरकार स्थापन केले. आज ते आम्हाला रावण म्हणतात. राम कोण आणि रावण कोण हे जनतेला ठाऊक आहे. ज्यांनी राममंदिराला विरोध केला, प्रभू रामाच्या अस्तित्वावर प्रश्न उपस्थित केला त्यांना रामाबद्दल बोलण्याचा अधिकार नाही,’’ असे शिंदे यांनी सुनावले.