वारसा वास्तूंचा नसतो, विचारांचा असतो, हे वाक्य गेल्या काही दिवसांपासून महाराष्ट्र नवनिर्माण सेनेच्या नेत्यांकडून सातत्याने बोललं जात आहेत. त्याच अनुषंगाने आता मनसे नेत्यांनी ट्वीटही केले आहेत. प्रबोधनकार ठाकरे आणि बाळासाहेबांच्या विचारांचा वारसा असं म्हणत त्यांनी एक फोटोही शेअर केला आहे.

मुख्यमंत्री एकनाथ शिंदे यांनी गणेशोत्सवानिमित्त राज ठाकरे यांच्या घरी जाऊन त्यांच्या घरच्या गणपतीचं दर्शन घेतलं. यावेळी एकनाथ शिंदे आणि राज ठाकरे या दोघांचा फोटोही मनसेच्या नेत्यांकडून शेअर करण्यात आला आहे. यावेळी मागच्या भिंतीवर प्रबोधनकार ठाकरे आणि बाळासाहेब ठाकरेंचे फोटोही दिसत आहेत. याच फोटोच्या अनुषंगाने मनसे नेते अमेय खोपकर, आमदार राजू पाटील यांनी सोशल मीडियावर पोस्ट केल्या आहेत.

आपल्या सोशल मीडिया पोस्टवर मनसे नेते म्हणतात की, प्रबोधनकार ते बाळासाहेब ते राजसाहेब. विचारांचा वारसा परफेक्ट 'क्लिक' झालाय. 'एक' साहेब आणि 'एक'नाथ साहेब. #श्रीगणेशा #बाप्पा_मोरया. हा फोटो पाहून आता चर्चांना उधाण आलं आहे. गेल्या अनेक दिवसांपासून मनसेकडून सातत्याने राज ठाकरे हेच बाळासाहेबांच्या विचारांचे वारसदार असल्याचा दावा केला जात आहे.