मुंबई : दरवर्षी येणारी उच्च न्यायालयाची उन्हाळी सुट्टी यंदा कोरोनामुळे रद्द करण्याचा निर्णय उच्च न्यायालय प्रशासनाने घेतला आहे. जर लॉकडाऊन अधिक वाढला नाही तर उन्हाळी सुट्टीत अर्धा तास जादा म्हणजे साडे दहा वाजता न्यायालयाचे कामकाज सुरु करण्यात येणार आहे.

मोठी बातमी : दिलासादायक बातमी : कोरोनासाठीच्या रुग्णालयांमध्ये ऑक्सिजन स्टेशन उभारणार

देशभरात सध्या लॉकडाऊन सुरु आहे आणि सर्व वाहतूक व्यवस्थाही बंद आहे. त्यामुळे उच्च न्यायालयानेही सोशल डिस्टन्सिंगमुळे व्हिडीओ कॉन्फरन्सिंगद्वारे सुनावणी सुरु केली आहे. लॉकडाऊनचा कालावधी ता. 3 मेपर्यत आहे. त्यानंतर लॉकडाऊन उठला आणि परिस्थिती सर्वसामान्य होत असेल तर उन्हाळ्यात न्यायालयांचे कामकाज नियमित सुरु होऊ शकते. ता. 7 मे ते ता. 7 जूनपर्यंत न्यायालयाला उन्हाळी सुट्टी आहे. मात्र यंदा ही सुट्टी होणार नसून कामकाज सुरु राहणार आहे. तसेच नेहमी 11 वा. सुरु होणारे काम या कालावधीत अर्धा तास लवकर सुरु होईल, त्यामुळे साडेदहा ते पाच या वेळेत काम चालू राहील, असे न्याय प्रशासनाच्या वतीने रजिस्ट्रार जनरल एस बी अग्रवाल यांनी सांगितले. मुंंबईसह, औरंगाबाद आणि नागपूर खंडपीठाचे कामकाजही सुरु राहणार असून जिल्हा न्यायालयांंचे कामही सुरु असेल.जर 3 मे नंतरही लॉकडाऊन सुरु राहिला तर सध्या आहे त्याप्रकारे काम होईल, असेही स्पष्ट केले आहे. 

नक्की वाचा : संकटात लढा देणाऱ्या पोलिसांना विशेष भत्ता आणि बोनस द्या, न्यायालयात याचिका

दिल्ली उच्च न्यायालयानेही उन्हाळी सुट्टी रद्द केली आहे तर सर्वोच्च न्यायालयातही तेथील वकिलांनी सुट्टी रद्द करण्याची मागणी केली आहे. सध्या उच्च न्यायालयात पाच स्वतंत्र न्यायालयामार्फत व्हिडीओ कॉन्फरन्सिंगद्वारे सुनावणी घेण्यात येते.
 

 Corona effect High Court cancels summer vacation