Crime News : महागड्या कार मधून आलेल्या चोरट्यानी बॅटरीचे दुकान फोडून दुकानातून लाखोंची बॅटरी चोरून नेल्याची घटना कोळसेवाडी परिसरात घडली होती. ही घटना सीसीटीव्ही मध्ये कैद झाली होती. या सीसीटीव्हीच्या आधारे कोळसेवाडी पोलिसांनी 3 जणांना मुंब्रा परिसरातून अटक केली आहे.

नौशाद खान, मुसीब खान व सलमान खान असे या आरोपीचे नावे असून पोलिसांनी या आरोपीकडून तीन गुन्हे उघडकीस आणत 7 लाख 50 हजाराचा मुद्देमाल हस्तगत केला आहे.

कल्याण कोळसेवाडी परिसरातील चक्की नाका परिसरात एका स्टार बॅटरीच्या दुकानामध्ये शनिवारी पहाटे चोरीची घटना घडली होती. याप्रकरणी कल्याण कोळसेवाडी पोलीस ठाण्यात गुन्हा दाखल करण्यात आला होता.

कोळसेवाडी पोलीस ठाण्याचे वरिष्ठ पोलीस निरीक्षक महेंद्र देशमुख यांच्या मार्गदर्शनाखाली या चोरट्यांचा शोध घेण्यासाठी विशेष पथकाची नेमणूक करण्यात आली होती. चोरीची ही घटना सीसीटीव्ही मध्ये कैद झाली होती. त्या आधारे पोलिसांनी आरोपींचा शोध सुरू केला.

दरम्यान पोलिसांना आरोपी हे मुंब्रा डोंगरी परिसरात असल्याची माहिती मिळाली. मिळालेल्या माहितीनुसार पोलिसांच्या पथकाने मुंब्रा येथे सापळा रचत या तिन्ही आरोपींना 24 तासाच्या आत बेड्या ठोकल्या.

आरोपीकडून 15 लाखापेक्षा अधिक रुपयाचा मुद्देमाल हस्तगत केला आहे. पोलिसांच्या माहितीनुसार हे तिन्ही आरोपी सराईत गुन्हेगार असून त्यांच्यावर मुंबईसह अनेक ठिकाणी मारहाण व इतर गुन्हेगारी पार्श्वभूमीचे गुन्हे दाखल आहेत. यांनी आणखी काही गुन्हे केले आहेत का याचा पोलीस शोध घेत आहेत.