Crime News: चॉकलेटचे आमिष देत आठ वर्षांच्या मुलीसोबत शेजाऱ्याने अश्‍लील कृत्य केल्याचा धक्कादायक प्रकार उघडकीस आला. मुलीची मोठी बहीण शाळेतून घरी परतल्याने ही घटना समोर आली. या प्रकरणी मुलीच्या आईच्या फिर्यादीवरून शेजाऱ्याविरोधात पोस्को कायद्यांतर्गत मनोर पोलिस ठाण्यात गुन्हा दाखल करण्यात आला आहे.

मनोर पोलिस ठाण्याच्या परिसरातील एका गावात आठ वर्षीय मुलीचे आई-वडील शेतीच्या कामानिमित्ताने घराबाहेर गेले होते. ती घरात एकटीच घराबाहेर खेळत बसली होती. दुपारी साडेतीन वाजण्याच्या सुमारास शेजारी राहणाऱ्या व्यक्तीने मुलीला आई-वडिलांची विचारपूस केली. घरात कोणी नसल्याचे समजल्यानंतर तिला चॉकलेटचे आमिष दाखवत घरात घेऊन गेला. दरम्यान तिची मोठी बहीण शाळेतून घरी आली असता शेजारी बहिणीसोबत बेडरूममध्ये आढळून आला.

तिला पाहून शेजारी घरातून निघून गेला. त्यानंतर मोठ्या बहिणीने वडिलांना फोन करून घटनेची माहिती दिली. या घटनेचा जाब विचारला असता शेजाऱ्याने पीडित मुलीच्या कुटुंबासोबत भांडण करत मारहाण केली. आरोपी केंद्र शासित प्रदेशातील रुग्णालयात उपचारासाठी दाखल असल्याने अटक केली नसल्याची माहिती मनोर पोलिसांनी दिली.