डोंबिवली - तू मला आवडते, मी तुझ्याशी लग्न करेन असे त्याने तिला सांगितले. महिलेने त्यास नकार दिल्याने तिच्या गळ्यावर चाकूने वार केल्याची घटना डोंबिवली परिसरात घडली आहे. याप्रकरणी टिळकनगर पोलिस ठाण्यात जिग्नेश जाधव याच्या विरोधात गुन्हा दाखल करण्यात आला आहे. सदर महिलेची प्रकृती गंभीर असून तिच्यावर कळवा येथील रुग्णालयात उपचार सुरू आहेत.

डोंबिवली पूर्वेतील शांतीनगर येथील जैन मंदिर समोरील रोडवर शुक्रवारी दुपारी दिडच्या सुमारास ही घटना घडली आहे. वाशी येथे राहणारी एक 25 वर्षीय विवाहित महिला डोंबिवलीत आई, बहीण आणि भावाला भेटायला आली होती. वडिलांकडे आली होती. टिळकनगर परिसरात राहणाऱ्या जिग्नेश यांच्यासोबत पूर्वीची मैत्री होती.

शुक्रवारी दुपारी सदर महिला पायी घरी येत असताना जिग्नेश याने तिला रस्त्यावर थांबविले. तु मला आवडते, मी तुझ्याशी लग्न करेन, तु माझ्या बरोबर ये असे सांगितले. सदर महिलेने त्यास नकार दिला. या नकाराचा राग आल्याने जिग्नेश याने त्याच्या जवळ असलेल्या धारदार चाकूने महिलेच्या गळ्यावर वार करत तिला गंभीर जखमी केले आहे.

यानंतर जिग्नेश याने घटनास्थळावरून पळ काढला. जखमी महिला त्याच अवस्थेत घरी आली. त्यानंतर तिचा भाऊ याने तिला उपचारासाठी डोंबिवली मधील शास्त्रीनगर रुग्णालयात दाखल केले.

मात्र महिलेची प्रकृती गंभीर असल्याने तिला कळवा येथील छत्रपती शिवाजी महाराज रुग्णालयात उपचारासाठी दाखल करण्यात आले. अतिदक्षता विभागात सध्या महिलेवर उपचार सुरू आहेत. महिलेच्या भावाने दिलेल्या तक्रारीवरून टिळक नगर पोलीस ठाण्यात जिग्नेश याच्या विरोधात गुन्हा दाखल करण्यात आला आहे. सहाय्यक पोलिस निरिक्षक प्रविण बाकले या प्रकरणाचा अधिक तपास करत असून आरोपीचा शोध घेत आहेत.