मानखुर्द : गोवंडीतील गौतम नगर येथील म्हाडा वसाहतीमध्ये बेकायदा फटाके बनवले जात होते.ते बनवत असताना गुरुवारी(ता.१७) सायंकाळी स्फोट झाला.त्यामध्ये गंगुबाई बैदे (७० वर्षे) व त्यांचा मुलगा योगेंद्र (५० वर्षे) जखमी झाले.त्यांच्यावर घाटकोपरच्या राजावाडी रुग्णालयात उपचार सुरू आहेत.देवनार पोलिसांनी दोघा मायलेकाविरोधात विविध कलमानुसार गुन्हा नोंदवून तपासाला सुरुवात केली असल्याचे वरिष्ठ निरीक्षक रवी अडाणे यांनी सांगितले.

गौतम नगरातील पंचशील सोसायटीमध्ये राहणारे बैदे कुटुंबीय मागील काही वर्षांपासून बेकायदेशीररीत्या फटक्यातील आपटी बॉम्ब बनवत होते.गुरुवारी सायंकाळी असाच स्फोटक पदार्थांपासून गंगुबाई आपटी बॉम्ब बनवत असताना स्फोट झाला.त्यामुळे त्यांच्या दोन्ही हातांना गंभीर इजा झाली तर टी वी पाहत बसलेला त्यांचा मुलगा योगेंद्र हादेखील जखमी झाला.त्यांना उपचारासाठी रुग्णालयात दाखल करण्यात आले आहे.अग्निशमन दलाने तत्काळ त्याठिकाणी धाव घेत पाहणी केली व पालिकेच्या कर्मचाऱ्यांना बोलावून फटाके बनवण्यासाठी लागणाऱ्या कच्च्या मालाची पोती जप्त केली.पहाटेच्या वेळी गंगुबाई चे कुटुंबीय उरलेले साहित्य घराबाहेर काढत असताना पुन्हा स्फोट झाला मात्र त्यात कोणतीही जीवितहानी झाली नाही.देवनार पोलिसांनी गुन्हा नोंदवून तपसाला सुरुवात केली आहे.