परतीच्या पावसाने शेतकर्याचे पार कंबरडे मोडले असून हातातोंडाशी आलेला घास हिरावून जाण्याच्या भीतीने शेतकरी हवालदिल झाला आहे.अश्विन महिन्याच्या उत्तरार्धात सुध्दा चित्रा नक्षत्र बरसत असल्याने भात पीक आडवे पडून लोंब्या गळू लागल्या आहेत.गेली 35 ते 40 वर्षात पहिल्यांदाच असा पाऊस पडत असल्याचे शेतकरी सांगतात

दिवाळीचा सण उंबरठ्यावर येऊन ठेपलाय तरी शेतकऱ्याला दिवाळी गोड लागणार नाही.यंदाच्या परतीच्या पावसाने शेतकऱ्यांच्या आशेवर पाणी फेरले आहे.अगोदरच्या समाधानकारक पावसामुळे भात पिक दर्जेदार येईल अशी आशा असतानाच अश्विन महिन्याच्या उत्तरार्धात सुध्दा दररोज सायंकाळी चित्रा नक्षत्र वादळी वाऱ्यासह मुसळधार बरसत असल्याने भात पीक आडवे पडून लोंब्या गळू लागल्या आहेत.

भात पीक कापल्यानंतर ते खळ्यात आणून झोडणे,भात सुकविणे व ते व्यापाऱ्याला विक्री करून आलेल्या पैशातून पोराबाळांच्या कपड्यालत्याची, घरातील जिन्नस-सामानाची व फटाक्यांची व्यवस्था करायची असे नियोजन असते ,परंतु या वर्षी सतत बरसत असलेल्या पावसामुळे "नको नको रे पावसा ...."असं म्हणण्याची वेळ आली आहे.

शेतात साठलेल्या पाण्यात पिकाची रोपे आडवी पडली असून दाण्याच्या लोंब्या गळून पडत आहेत.गेली 35 ते 40 वर्षात पहिल्यांदाच असा पाऊस पडत असल्याचे शेतकरी सांगतात .भात कापणीसाठी शेतात गेलेल्या शेतकर्याला पिकाचे विदारक दृष्य बघून डोके धरायची वेळ आली असून चौफेर नुकसानीच्या खाईत सापडलेल्या शेतकऱ्यांना आता पिक विम्याची आस लागून राहीली आहे.