मुंबई - मुंबई विमानतळ प्रशासनाच्या वतीने डिसेबल्ड एअरक्राफ्ट रिकव्हरी किट विमानतळावर तैनात करण्यात आली आहे. या किटमुळे अपघातग्रस्त विमानाला धावपट्टीवरून जलदगतीने बाजूला करता येणार आहे. विशेष म्हणजे अशी यंत्रणा वापरणारे मुंबई विमानतळ आशियातील पहिले विमानतळ ठरले आहे.

धावपट्टीवरील अपघातग्रस्त विमान जलद गतीने बाजूला करण्यासाठी आणि विमान सेवा सुरळीत करण्यासाठी मुंबई विमानतळ प्रशासनाने एक अत्याधुनिक डिसेबल्ड एअरक्राफ्ट रिकव्हरी किट (डीएआरके) खरेदी केली आहे. छत्रपती शिवाजी महाराज आंतरराष्ट्रीय विमानतळावर एअरक्राफ्ट रिकव्हरी किट तैनात करण्यात आली आहे.

३९० मेट्रिक टन वजनाचे बी 777-300 यासह जगातील सर्वात मोठे व्यावसायिक वजनी विमान उचलण्याची क्षमता डार्क किटमध्ये आहे. विशेष म्हणजे डार्क किट वापरणारे मुंबई विमानतळ आशियातील पहिले विमानतळ ठरले आहे. विशेष म्हणजे डिसेबल्ड एअरक्राफ्ट रिकव्हरी किट कमी मनुष्यबळा हाताळू शकते.

वेळेची होणार बचत -

धावपट्टीवर घसरलेले विमान उचलण्यासाठी डिसेबल्ड एअरक्राफ्ट रिकव्हरी किटमध्ये डी-बॉगिंग आणि टोइंगपर्यंतची सुविधा देण्यात आली आहे. या उपकरणांचे कॉम्पॅक्ट डिझाइन त्याची वाहतूकक्षमता वाढवते, ज्यामुळे बचावकर्ते अपघाताच्या ठिकाणी जलद आणि प्रभावीपणे पोहोचू शकतात. डार्क किटमुळे मुंबई विमानतळावर व्यत्यय कमी करू शकते आणि धावपट्टीवर विमान वाहतूक वेगाने सुरु करण्यासाठी डार्क किट उपयोगी पडणार आहे.

कर्मचाऱ्यांना प्रशिक्षण

मुंबई विमातळाच्या उच्च प्रशिक्षित एअरक्राफ्ट रेस्क्यू अँड फायर फायटिंग (ARFF) अधिकार्‍यांना या अत्याधुनिक डिसेबल्ड एअरक्राफ्ट रिकव्हरी किट हाताळण्याचे प्रशिक्षण देण्यात आले आहे. हे प्रशिक्षण पाच दिवस देण्यात आले आहे. ज्यामध्ये किट वापरण्याचे कायदेशीर पैलू, टिथरिंग, ग्राउंड स्टॅबिलायझेशन, कमी दाबाच्या पिशव्या वापरून विमान उचलण्याचे तंत्र, आणि डी-बॉगिंग प्रक्रियाचे प्रशिक्षण देण्यात आले आहे.