मुंबई- चार टप्प्यातील लोकसभेचं मतदान पूर्ण झाल्यानंतर आता सर्वांच लक्ष हे महामुंबईकडे लागलं आहे. यातही मुख्यमंत्री एकनाथ शिंदे यांच्या ठाणे जिल्ह्यात आणि पालघर जिल्ह्यामध्ये महत्त्वाच्या लोकसभा मतदारसंघांचा समावेश आहे. अशावेळी मुख्यमंत्र्यांनी घेतलेल्या एसटी संदर्भातल्या निर्णयामुळे याचा थेट फायदा हा महायुतीला होईल असे चित्र पाहायला मिळत आहे.

मुख्यमंत्री एकनाथ शिंदे यांनी एसटीतून प्रवास करणाऱ्या महिलांसाठी 50% सूट जाहीर केली. मुख्यमंत्र्यांनी घेतलेल्या या निर्णयाचा थेट फायदा हा ठाणे जिल्ह्यातील आणि पालघर जिल्ह्यातील लोकसभा मतदारसंघांना होऊ शकतो असे पाहायला मिळत आहे.

कल्याण, भिवंडी, पालघर या लोकसभा मतदारसंघांमध्ये मोठ्या प्रमाणावर ग्रामीण भाग येतो. या ग्रामीण भागामध्ये रोजगाराचा अभाव असल्यामुळे याठिकाणी नागरिकांना मुंबई किंवा इतर मोठ्या शहरांमध्ये नोकरी धंद्यासाठी जावं लागतं. यात महिलांची संख्या मोठी आहे.

अशावेळी या ठिकाणहून शहराकडे जाण्यासाठी एसटीचा प्रवास महिला वर्ग करत असतात. या महिला वर्गावर कित्येक वेळा संपूर्ण कुटुंब अवलंबून असतं. मुख्यमंत्री एकनाथ शिंदे यांनी महिलांसाठी एसटीमध्ये केलेल्या 50% तिकीट सवलतीमुळे त्यांचा प्रवास खर्च मोठ्या प्रमाणावर वाचत आहे. पर्यायी या भागातील कष्टकरी महिला आणि त्यांच्या कुटुंबाकडून मुख्यमंत्र्यांनी घेतलेल्या या निर्णयाचं कौतुक केलं जात असून याचा थेट फायदा हा महायुतीच्या उमेदवारांना होईल असेच चित्र पाहिला मिळत आहे.

माझ्या परिसरातील मोठ्या प्रमाणावर महिला कामासाठी तालुक्याच्या ठिकाणी जातात. अशावेळी त्यांना एसटीमध्ये तिकिटात सूट मिळत असल्यामुळे महिलांमध्ये या निर्णयामुळे आनंदाचे वातावरण आहे, अशी प्रतिक्रिया भिवंडी येथील पौरवी वाघ यांनी दिली.