मुंबई : धनगर समाजाच्या आरक्षणासंदर्भात काम करण्यासाठी शिंदे समिती स्थापन करण्यात आली होती. या समितीनं आपला अहवाल राज्य सरकारकडं सादर केला आहे. पण सरकारनं तो अद्याप स्विकारलेला नाही, त्यामुळं धनगर समाजाचे नेते प्रकाश शेंडगे यांनी सरकारला आजच हा अहवाल स्विकारण्याचं आवाहन केलं आहे, त्याचबरोबर एक गंभीर इशाराही दिला आहे.

प्रकाश शेंडगे म्हणाले, "धनगर आरक्षणाच्या एसटी समाजात समावेश करण्याची अंमलबजावणी करण्याचा जीआर हा आचारसंहिता लागण्यापूर्वी काढला जाईल अशा प्रकारचं आश्वासन आम्हाला मुख्यमंत्र्यांनी दिलेलं आहे. यासाठी त्यांनी १५ दिवसांची मुदत दिली होती ती देखील आता संपलेली आहे"

हा जीआर काढण्याच्या प्रक्रियेतील महत्वाचा दुवा जो आहे तो सुधारकर समितीचा अहवाल आहे. हा अहवाल गेल्या २ तारखेला शासनाकडं सादर झालेला आहे. पण त्या २ तारखेपासून ७ तारखेपर्यंत हा अहवाल शासन दरम्यान धुळखात पडून आहेत. कुठलीही यंत्रणा किंवा मुख्यमंत्र्यांना यासाठी वेळ नाही आणि यंत्रणाही गाफील आहे.

त्यामुळं मंत्रालयात आज मुख्यमंत्र्यांचे प्रधान सचिव आणि ओबीसी कल्याण मंत्रालयाच्या प्रधान सचिवांना भेटून मी सांगितलं आहे की, आज हा अहवाल सादर नाही झाला तर प्रकाश शेंडगे आणि समितीतील सदस्य लोक हे मंत्रालयातील जाळ्यांवर उड्या टाकल्याशिवाय राहणार नाहीत. त्यानंतर त्याचे जे पडसाद उमटतील महाराष्ट्रात त्याची जबाबदारी महाराष्ट्र शासनावर राहील. त्यामुळं आजच्या आज हा अहवाल स्विकारावा आणि आचारसंहितेसाठी जर जीआर नाही निघाला तर धनगर समाजाचा उद्रेक महाराष्ट्रात पाहायला मिळेल, अशा इशारा यावेळी प्रकाश शेंडगे यांनी दिला.