मुंबईः कोरोना व्हायरसनं सर्वत्र थैमान घातलं आहे. दिवसेंदिवस कोरोनाबाधितांचा आकडा वाढताना दिसतोय. त्यातच कोरोना व्हायरसचा प्रसार रोखण्यासाठी प्रशासनाकडून विविध पातळीवर प्रयत्न केले जात आहेत. दिलासादायक बाब म्हणजे, मुंबईत कोरोना बऱ्यापैकी नियंत्रणात आला आहे. एकेकाळी धारावी हा परिसर कोरोनासाठी हॉटस्पॉट ठरला होता. मात्र आता धारावीत कोरोना नियंत्रणात आला आहे. रुग्णांची तपासणी करणं, त्यांच्यावर उपचार करणं आणि त्यांना आयसोलेट करणं या उपाय योजनांमुळेच धारावीतील रुग्णांच्या संख्येत घट झाली आहे.

मुंबईतील धारावीत नव्या कोविड १९ रुग्णांचा आकडा हा एकेरी आकड्यात नोंदवण्यात आला आहे. धारावीत रविवारी फक्त ५ नवे रुग्ण आढळून आलेत. या भागात एकूण कोरोना व्हायरसची संख्या २,६१७ वर पोहोचली आहे.

धारावीत कोरोनाबाधित रुग्णांची संख्या दररोज वाढत होती. त्यामुळे सगळ्यांना चिंता लागून राहिली होती. त्यानंतर मुंबई महापालिकेनं या भागात मिशन धारावी ही योजना राबवली. त्यानंतर त्याचे चांगले परिणाम दिसून आलेत. मिशन धारावीमुळे रुग्णांची संख्या कमी करण्यात यश आलं आहे. 

हेही वाचाः मुंबईत गेल्या 24 तासात 1,066 नवीन रुग्णांची भर; वाचा इतर सविस्तर आकडेवारी 

या परिसरात २,६१७ कोरोनाबाधित रुग्णांची नोंद झाली. त्यात सद्यपरिस्थितीत, ८० अॅक्टिव्ह रुग्ण असून २,२७१ रुग्ण बरे होऊन त्यांना डिस्चार्ज देण्यात आला आहे. कोरोना व्हायरसचा  हॉटस्पॉट ठरल्यानंतर धारावीमध्ये गेल्या महिन्याभरात नवीन कोरोनाबाधित रुग्णांच्या प्रकरणांची नोंद कमी झाली आहे. 

दादरमध्ये ३१ नव्या रुग्णांची भर पडली असून या भागातील आकडा २,०२० वर पोहोचला आहे. सध्या येथे ४५८ अॅक्टिव्ह रुग्ण आहेत. आतापर्यंत दादरमध्ये १,४७८ रुग्ण बरे झालेत.

अधिक वाचाः आज शिक्षकांचे अन्नत्याग आंदोलन; पेन्शन नाकारणारी अधिसूचना रद्द करण्याची मागणी

माहिममध्ये गेल्या २४ तासात १७ नवे रुग्ण आढळून आले. येथील कोरोनाबाधित रुग्णांचा आकडा १,८५५ वर पोहोचला आहे. सध्या येथे २७२ अॅक्टिव्ह रुग्ण आहेत. आतापर्यंत १,५०९ रुग्णांना डिस्चार्ज देण्यात आलाय.

Dharavi COVID 19 five cases coronavirus tally 2617