विरार : डॉ. मैथिली शरण सिग्नेचर आंतरराष्ट्रीय पुरस्कार हा वसईतील नामवंत स्त्री-रोगतज्ज्ञ डॉ. साकेत हेमंत पाटील यांना नुकताच प्रदान करण्यात आला. गोवा येथील एका कार्यक्रमात डॉ. साकेत हेमंत पाटील यांना आंतरराष्ट्रीय पुरस्काराने सन्मानित करण्यात आले.

एखाद्या व्यक्तीचे समाजाप्रती असलेले कार्य जागतिक व्यासपीठावर आणून त्या व्यक्तीचा तसेच त्याच्या कार्याचा सन्मान करणे या उद्देशाने सुवाच आणि साऊथ एशियन फेडरेशन ऑफ ओबीसीटेरिकस आणि गायनॅकोलॉजी यांच्या संयुक्त विद्यमाने हा पुरस्कार दरवर्षी दिला जातो. या वर्षी डॉ. साकेत हेमंत पाटील यांना त्यांनी केलेल्या तसेच त्यांच्या अगोदरच्या पिढीने केलेल्या ग्रामीण भागातील उल्लेखनीय वैद्यकीय सेवेबद्दल हा सन्मान देऊन गौरवण्यात आले.

डॉ. साकेत हेमंत पाटील हे त्यांचे वडील ‘कोविडयोद्धा’ स्व. डॉ. हेमंत दामोदर पाटील यांच्या पावलावर पाऊल ठेवून त्यांची समाजाभिमुख असलेली स्वप्ने पूर्ण करण्याचा सर्वतोपरी प्रयत्न करीत आहेत. आपल्या वडिलांच्या स्मरणार्थ डॉ. साकेत पाटील यांनी वसईतील पारनाका येथे नायशा प्रसूतीगृह सुरू केले. डॉ. साकेत हेमंत पाटील हे अत्यंत वाजवी किमतीत गर्भवती स्त्रियांना वैद्यकीय सेवा त्यांच्या प्रसूतीगृहात प्रदान करतात. स्त्रियांच्या इतर आजारांच्या उपचाराबरोबरच तेथे गर्भसंस्कारविषयक माहिती देणे, गर्भाशय आणि गर्भाशयाच्या मुखाच्या कर्करोगाविषयी जागरूकता निर्माण करणे या समाजाभिमुख जनजागृतीच्या उद्देशाने दर महिन्याला विनामूल्य शिबिराचे आयोजन केले जाते.

या शिबिराचा अनेक महिला फायदा घेत आहेत. डॉ. साकेत पाटील हे वसई विरार शहर महानगरपालिकेच्या रुग्णालयात स्त्री-रोग तज्ज्ञ म्हणून कार्यरत आहेत. सरकारी रुग्णालयात गरोदर स्त्रियांना उत्तमोत्तम आरोग्य सेवा मिळावी यासाठी ते तेथील कर्मचार्‍यांना प्रशिक्षण देत असतात. ‘‘माझे दिवंगत वडील डॉ. हेमंत दामोदर पाटील यांचे तसेच माझी आई डॉ. शुभांगी पाटील यांचे वैद्यकीय आणि सामाजिक कार्य पुढे नेण्यास हा पुरस्कार मला नेहमीच प्रोत्साहित करेल,’’ असा विश्वास डॉ. साकेत पाटील यांनी पुरस्कार स्वीकारताना व्यक्त केला.