डोंबिवली - कल्याण मधील प्रसिद्ध बांधकाम व्यावसायिक मंगेश गायकर आणि त्यांचा मुलगा गोळीबारात जखमी झाल्याची घटना समोर आली आहे. ही घटना मंगेश गायकर यांच्या चिकन घर येथील कार्यालयात गुरुवारी घडली. दोघांनाही तातडीने कल्याणमधील मीरा हॉस्पिटलमध्ये उपचारासाठी दाखल करण्यात आले आहे. सध्या पोलिसांकडून या घटनेचा तपास सुरू आहे.

प्राथमिक माहितीनुसार, मंगेश गायकर यांच्या संरक्षणासाठी दिलेली बंदूक साफ करत असताना चुकून गोळी सुटली, ज्यामुळे मंगेश आणि त्यांचा मुलगा जखमी झाले आहेत. गोळी अपघाताने चालली की कोणी इतरांनी गोळीबार केला, हे अद्याप स्पष्ट झालेले नाही.

मंगेश गायकर यांच्या कार्यालयात त्यांचे व्यावसायिक पार्टनर आणि इतर सहकारी एकत्र बसले होते. यावेळी बंदूक साफ करत असताना मंगेश यांच्या हातून गोळी सुटली. ती गोळी त्यांच्या हाताच्या आरपार गेली आणि त्यांच्या मुलालाही लागली. या घटनेनंतर तातडीने पोलिसांना माहिती देण्यात आली आणि दोघांना मीरा हॉस्पिटलमध्ये दाखल करण्यात आले.

पोलिसांनी घटनास्थळी दाखल होऊन सखोल तपास सुरू केला आहे. सध्या गायकर यांना गोळी कशी लागली यावर संशोधन सुरू असून, यामध्ये मिस फायरिंग झाल्याची शक्यता असल्याचे सांगितले जात आहे. तसंच पोलिसांनी रुग्णालयात चौकशी केली असून, या प्रकरणाचा तपास अधिकाऱ्यांकडून करण्यात येत आहे.