नवी मुंबई : पोलिसांवर चप्पल भिरकावून त्यांच्यासोबत धक्काबुक्की करणाऱ्या तीन महिलांसह चौघांविरोधात नेरुळ पोलिसांनी (Nerul Police) सरकारी कामात अडथळा आणून धक्काबुक्की केल्याप्रकरणी गुन्हा दाखल (police complaint filed) केला आहे. शुक्रवार (ता. ४) सायंकाळी ही घटना नेरुळ पोलिस ठाण्यासमोर घडली होती. आयशा रफीक शेख, आयशा समीर शेख आणि रेश्मा शेख व रफीक शेख (चौघेही राह. दारावे, नेरुळ) यांच्याविरोधात गुन्हा दाखल करण्यात आला आहे. शेजारी राहणाऱ्या टुंपा दलाई या महिलेसोबत किरकोळ कारणावरून वाद होऊन भांडण झाले होते. त्यामुळे टुंपा दलाई ही महिला नेरुळ पोलिस ठाण्यात त्यांच्या विरोधात तक्रार देण्यासाठी गेली होती.

त्यानुसार नेरुळ पोलिसांनी आयशा रफीक शेख, आयशा समीर शेख, रेश्मा या तिन्ही महिलांविरोधात अदखलपात्र गुन्ह्याची नोंद केली. त्यामुळे या तिन्ही महिलांनी नेरुळ पोलिस ठाण्यात जाऊन टुंपा दलाई या महिलेसोबत हुज्जत घालून भांडण करण्यास सुरुवात केली.
पोलिसांनी त्यांना समजावून पोलिस ठाण्याबाहेर काढल्यानंतर देखील त्यांच्यात जोरजोरात भांडण सुरूच राहिल्याने महिला पोलिसांसह इतर पोलिस कर्मचारी त्यांना समजावण्यासाठी रस्त्यावर गेले होते.

तेव्हा एका महिलेने पोलिसांवर चप्पल भिरकावली. तसेच महिला पोलिस व इतरासोबत धक्काबुक्की केली. त्यानंतर सदर महिलेसोबत असलेल्या इतर महिलांनी व पुरुषाने देखील पोलिसांना बघून घेण्याची धमकी देऊन त्यांना शिवीगाळ केली.