Dombivli: अंगारकी चतुर्थीनिमित्त ठाणे जिल्ह्यातील बाळे गावातील प्राचीन गणपती मंदिरात सकाळपासूनच भाविकांनी श्री गणेशाचे दर्शन घेण्यासाठी गर्दी केली आहे. अंगारकी निमित्त श्री गणेशाचा गाभारा आकर्षक फुलांनी सजविण्यात आला आहे.

अत्यंत मंगलमय वातावरणात भाविक गणेशाचे दर्शन घेत आहेत. तर दर्शनासाठी मोठ्या संख्येने येणाऱ्या भाविकांसाठी ग्रामस्थांनी उत्तम अशी व्यवस्था केली आहे.

ठाणे तालुक्यातील बाळे गावात प्राचीन श्री गणेशाचे मंदिर आहे. या मंदिरात भाविक मोठ्या संख्येने गणेशाच्या दर्शनासाठी येत असतात. मंगळवारी अंगारकी चतुर्थी निमित्त पहाटेपासूनच भाविकांनी मंदिरात दर्शनासाठी गर्दी केली असून भाविकांच्या लांबच लांब रांगा या परिसरात लागल्याचे दिसून आले आहे.

ठाणे रायगड जिल्ह्याच्या सीमेवर असलेल्या या गणेश मंदिरात दोन्ही जिल्ह्यातील भाविक प्रत्येक चतुर्थीला दर्शनासाठी येत असतात. विशेष म्हणजे माघी गणेशोत्सव काळात बाळे गावात घरोघरी श्री गणेशाची स्थापना न करता या मंदिरातील गणपतीची पूजा अर्चा केली जाते. एक गाव एक गणपती एक गणेशोत्सव येथे साजरा करण्यात येतो. त्यामुळे या मंदिराला वेगळे असे महत्त्व प्राप्त आहे.

मंगळवारी अंगारकी निमित्त गणपती मंदिराला तसेच देवाच्या गाभाऱ्याला आकर्षक अशा फुलांची आरास करण्यात आली आहे.

मंगलमय वातावरणात तासन तास रांगेत उभे राहून भाविक दर्शन घेत आहेत. दर्शनसाठी वेळ लागत असला तरी येथील ग्रामस्थांनी भाविकांसाठी उत्तम सोय केल्याने भाविकांनी ग्रामस्थांच्या नियोजनाचे स्वागत केले आहे.