मुंबई : सातवीच्या वर्गात शिकणाऱ्या एका ११ वर्षीय विद्यार्थीनीचा शिक्षकाकडून विनयभंग करण्यात आल्याचा धक्कादायक प्रकार समोर आला आहे. जुलै महिन्यात घडलेल्या याप्रकरणी पोलिसांनी संबंधित आरोपी शिक्षकावर गुन्हा दाखल केला असून आरोपीसह पीडित विद्यार्थीनी, मुख्याध्यापक आणि तिच्या पालकांचा जबाब नोंदवण्यात आला आहे.

काय आहे घटना?

जुलै महिन्याच्या शेवटी कांदिवलीतील एका शाळेत हा विद्यार्थीनीचा शिक्षकाकडून विनयभंगाचा प्रकार घडला होता. या घटनेची माहिती पीडित विद्यार्थीनीनं स्वतःच शाळेच्या मुख्याध्यापकांकडं केली होती. यानंतर बुधवारी याप्रकरणी आरोपी शिक्षकावर गुन्हा दाखल करण्यात आला आहे.

मुख्यध्यापकांची भूमिका महत्वाची

कांदिवली पोलिसांच्या माहितीनुसार, अल्पवयीन मुलीनं मुख्याध्यापकांना सांगितलं की, जुलै महिन्याच्या शेवटच्या आठवड्यात एक दिवस जेव्हा वर्ग संपला तेव्हा तीला शाळेतील एका शिक्षकानं वर्गाबाहेर बोलावून घेतलं आणि तिला चुकीच्या पद्धतीनं स्पर्श केला. यानंतर मुख्याध्यापकांनी थेट पोलीस स्टेशन गाठलं आणि पीडित विद्यार्थीनीच्या तक्रारीवरुन पोक्सो अॅक्ट अंतर्गत शिक्षकाविरोधात तक्रार दाखल केली.

दरम्यान, कांदिवली पोलिसांनी संबंधित शिक्षकावर गुन्हा दाखल केला असून त्याला जबाब नोंदवण्यासाठी पोलीस ठाण्यात बोलावून घेतलं. त्याचबरोबर मुख्याध्यापक आणि पीडित मुलीच्या पालकांचा देखील जाबाब नोंदवण्यात आला आहे.