खर्डी - कसारा घाटातील मुंबई-नाशिककडे येणाऱ्या-जाणाऱ्या महामार्गावरील रस्त्यालगत असणाऱ्या डोंगरावरून वाहणाऱ्या नैसर्गिक धबधब्यावर प्रवासी आपल्याकडील वाहन थाबवून धबधब्यात भिजण्याचा आनंद घेत असल्याने येथे वाहनांची व पर्यटकाची वर्दळ वाढत असून वहातुक कोंडी होत असल्याने येथे अपघात होऊन नाहक प्रवाश्याचा बळी जाण्याची शक्यता निर्माण झाली आहे.

ह्या ठिकाणी वाहनांच्या लाबच्या लाब रांगा लागत असून हौशे गवशे नवसे धबधब्यावर कुटूंबासोबत गर्दी करून वहातुक कोंडी निर्माण करत आहेत. त्यामुळे येथे अपघात होण्याची शक्यता निर्माण झाली असून, पोलिसांनी या हौशी पर्यटकांवर आवर घालण्याची मागणी जोर धरत आहे. गेल्या 12 दिवसांपूर्वी येथे 5 गाड्यांचा अपघात होऊन 9 जण जखमी झाले होते. पोलिसांनी येथे लावलेले बॅरिकेट्स बाजूला करून पर्यटक धबधब्यात भिजण्याचा आनंद घेत असून पर्यटकांची वाहने येथे उभी राहत असल्याने येथे वहातुक कोंडी होऊन अपघात होत असतात.

कसारा घाटातील नाशिक-मुंबईकड़े येणाऱ्या-जाणाऱ्या रस्त्यात वाकणाच्या ठिकाणी मोठमोठे धबधबे असून येथे अनेक ये-जा कुटूंब धबधब्याखाली मनसोक्त भिजण्याचा आनंद घेत आहेत. ह्या ठिकाणी वनविभागाकडून वाहन न थांबण्याचा बोर्ड लावलेला असूनही धबधब्याचा आनंद घेण्यासाठी लहान गाड्यातील बायका-पोर, तरुण -तरुणी प्रवाशी थांबत असल्याने वहातुक कोड़ी होत आहे.

तसेच धबधब्यावरून कोसळणाऱ्या पाण्याससोबत दरड कोसळण्याची शक्यता असल्याने यासाठी कसारा पोलिसांनी व रस्त्याच्या ठेकेदाराने येथे प्रवाश्यानी थांबु नये यासाठी सुरक्षा उपाय योजना करून नाहक कोणाचा अपघात होऊन बळी जाणार नाही. याची काळजी घ्यावी व नाहक वाहने थांबवून वहातुक कोंडी करणाऱ्या वाहन चालकांवर कारवाई करावी अशी मागणी जड़ वाहन चालक करीत आहेत.

ह्याठिकाणी वारंवार अपघात होत असल्याने पोलिसांनी वेळीच हस्तक्षेप करून येथे थांबणाऱ्या वाहनांना अटकाव करण्याची गरज आहे.तर संबंधित ठेकेदाराने धबधब्यावर सुरक्षाचे उपायकरणे गरजेचे आहे.

'नाशिक कडून येताना उतार असल्याने गाड्या जोरात येतात,परंतु येथे लहान गाड्या दाटीवाटिने उभ्या असल्याने गाड्यावरिल ताबा सुटल्यास मोठा अपघात होऊन जीवितहानी होउ शकते. यासाठी येथे पोलिसांनी येथे गाड्या उभ्या करण्यास मनाई करावी.

- रामदास धोंगडे/रमीज शेख, जड़वाहन चालवीणारे चालक.

'कसारा घाटात पर्यटक थांबत असल्याने महामार्गावर पोलीस गस्त घालत असून, धबधब्याच्या ठिकाणी ब्रेकेट्स लावण्यात आले असून, येथे वहातुक कोंडीस कारणीभूत ठरणाऱ्या वाहन चालकावर कारवाई करण्यात येईल.

- डी. के. कोल्हे, पोलीस निरीक्षक, कसारा.

कोकणाचे प्रवेशद्वार म्हणजे निसर्गाने नटलेल्या शहापूर तालुक्यात कसारा घाटात अनेक वळणावर पावसाळ्यात धबधबे निर्माण होत असल्याने ये-जा करणाऱ्या प्रवाशांना धबधबे आपल्याकडे आकर्षित करत असल्याने प्रवाशी थांबत असतात.या कसारा घाटातील रस्त्याच्या बाजूला माळशेज घाटाप्रमाणे विकास झाल्यास अनेक पर्यटक थांबतील, लहान धबधबे, बाजूला अशोका धबधबा अशी पर्यटन स्थळे असल्याने स्थानिक आदिवासी बांधवांना पर्यटकांच्या माध्यमातून रोजगार उपलब्ध होईल.

- पांडुरंग बरोरा, माजी आमदार, शहापुर.