मुंबई - मदुराई ते मुंबई आणि कोलकाता ते बंगळुरू विमानाचे इंजिन हवेतच बंद पडल्याची धक्कादायक घटना घडली आहे. हे दोन्ही विमान इंडिगो कंपनीचे आहे. मात्र, सुदैवाने वैमानिकांच्या प्रसंगावधानामुळे विमानाला मुंबई विमानतळावर सुरक्षितरित्या उतरवण्यात आले. दोन्हीं विमानातील सर्व प्रवासी सुरक्षित असून या घटनेत कोणतीही जीवितहानी झालेली नसल्याची माहिती मिळत आहे.

मिळालेल्या माहितीनुसार, इंडिगो विमान ए ३२१ (व्हीटी-आययूजे) मंगळवारी मदुराईहून मुंबईला येते होते. या विमानाच्या एका इंजिनमध्ये उच्च दाबाचे कंपन दिसून आले. इंजिन ऑइल प्रेशरबाबत इशारा मिळताच तात्काळ इंजिन -१ बंद करण्यात आले.

त्यानंतर वैमानिकाने विमानाच्या लँडिंगसाठी मुंबई विमातळावरील एटीसीशी संपर्क साधला. त्यानंतर विमानतळ प्रशासनाने तात्काळ रनवे उपलब्ध करून देत विमानाची सुरक्षित लँडिंग करण्यात आले. तर दुसरी घटना कोलकाता-बंगळुरू विमानाचे प्रॅट अँड व्हिटनी इंजिन क्रमांक २ तांत्रिक समस्येमुळे हवेतच बंद पडले.

त्यालाही विमान मुंबईत सुरक्षितपणे उतरवण्यात आले आहे. या दोन्ही घटनेत कोणतीही जीवितहानी झालेली नसल्याची माहिती नागरिक विमान वाहतूक महासंचालनालयांच्या (डीजीसीए) एक वरिष्ठ अधिकाऱ्यांनी दिली आहे.

इंडिगोच्या विमानाची तपासणी होणार

पी अँड डब्लू इंजिनमध्ये समस्या इंडिगो आणि गो फस्ट एअरलाइन्सच्या सुमारे ४० विमानांमध्ये ही समस्या निदर्शनास आली आहे. त्यामुळे या घटनेची नागरिक विमान वाहतूक महासंचालनालयाने घेतली आहे. प्रवाशांची सुरक्षा लक्षात घेऊन इंडिगो ताफ्यातील विमानाची तपासणी आता नागरिक विमान वाहतूक महासंचालनालयाकडून करण्यात येणार आहे.