डोंबिवली - नाशिक जिल्ह्यातील मालेगावहून काही कामानिमित्त कल्याणात आलेल्या नोकरदार तरूणींना कल्याण मध्ये चोरट्यानी लुटले असल्याची घटना घडली आहे. हॉटेलात नास्ता करण्यासाठी गेलेल्या दोघा बहिणींची कार फोडून चोरट्यांनी त्यातील 3 लाख 68 हजार रुपये किंमतीचा ऐवज लंपास केला आहे. तरुणीने दिलेल्या तक्रारीनुसार महात्मा फुले चौक पोलिस ठाण्यात अज्ञात चोरट्यांच्या विरोधात गुन्हा नोंदविण्यात आला आहे.

महात्मा फुले चौक पोलीस ठाण्यात मालेगाव येथे राहणारी चैताली मोरे (वय 29) या तरुणीने दिलेल्या तक्रारीनुसार ही तरूणी तिची बहिण लिलानी हिच्यासह काही कामानिमित्त कल्याण पश्चिमेत आली होती. शनिवारी सकाळी 6 च्या सुमारास गुरुदेव हॉटेलमध्ये नाश्ता करण्यासाठी जायचे असल्याने जवळच कार पार्क करून त्या हॉटेलमध्ये गेल्या. साधारण अर्धा तासात त्या बाहेर आल्या असता त्यांना कारची अवस्था पाहून धक्का बसला.

कारच्या डाव्या बाजूस असलेली काच फुटलेली होती. कारमधील 4 बॅग गायब झाला होत्या. त्यामध्ये लॅपटॉप, आयपॅड, ज्वेलरी सेट, आधार कार्ड, क्रेडिट कार्ड, ड्रायव्हिंग लायसन्स, पॅन कार्ड, कंपनीचे ओळखपत्र, बहिण लिलानी हिच्या बॅगेत महागडा लॅपटॉप, कॉस्मेटिक सामान, कपडे गॉगल, चष्मा, आदी 3 लाख 68 हजार रूपये किंमतीचा ऐवज चोरीला गेला आहे.

याप्रकरणी महात्मा फुले चौक पोलिसांनी गुन्हा दाखल करत तपास सुरू केला आहे. परिसरातील सीसीटीव्ही पोलिसांकडून तपासले जात आहेत.