Mumbai: मराठी भाषेच्या संवर्धन आणि विकासासाठी उत्तम आणि दर्जेदार होण्यासाठी मुंबईतील मराठी भाषा भवनाच्या माध्यमातून अधिक जोमाने काम करण्याचे आवाहन मुख्यमंत्री एकनाथ शिंदे यांनी केले. बृहन्मुंबई पालिका विकासनिधी तथा मुंबई शहर जिल्हांतर्गत जिल्हा वार्षिक योजनेतील विविध विकासकामांच्या भूमिपूजन तसेच लोकार्पणाप्रसंगी दूरदृश्य प्रणालीवरून ते बोलत होते.

मराठी भाषा भवनाचे आज सागराच्या भूमिपूजन होत असल्याचा आनंद होत आहे. या भवनाच्या माध्यमातून मराठी भाषेच्या संवर्धन, संशोधन आणि प्रसारासाठी अधिक बळ मिळेल, असा विश्वास त्यांनी व्यक्त केला. तसेच, भाषा भवनासाठीच्या साहित्यिक व अन्य क्षेत्रातून आलेल्या सूचनांवर काम केले जाईल, असे म्हणाले.

मराठी भाषेला अभिजात भाषेचा दर्जा मिळण्यासाठी अनेकांचे योगदान आहे. संतांनी अभंग, गवळण, भारूड यातून मराठी भाषेचे सौंदर्य समोर आणले. ज्ञानपीठकारांनी आणि सर्व साहित्यिकांनी भाषा समृद्ध केल्याचा दावाही त्यांनी केला. या कार्यक्रमाला विधानसभा अध्यक्ष ॲड. राहुल नार्वेकर, शालेय शिक्षण आणि मराठी भाषामंत्री तथा मुंबई शहर जिल्ह्याचे पालकमंत्री दीपक केसरकर, ज्येष्ठ साहित्यिक मधू मंगेश कर्णिक, मराठी भाषा सल्लागार समितीचे अध्यक्ष डॉ. लक्ष्मीकांत देशमुख आदी उपस्थित होते.

साहित्यिकांच्या राहण्याची मुंबईत सोय

मुंबईत येणाऱ्या साहित्यिकांच्या राहण्याची सोय व्हावी, यासाठी कवी मंगेश पाडगावकर यांच्या नावाने साहित्य भवन बांधणार येणार आहे. तसेच, सातारा येथे विश्वकोश मंडळासाठी नवीन इमारत, प्रत्येक जिल्ह्यात पुस्तकाचे गाव केले जाणार आहे.

मराठी भाषेला अभिजात भाषेचा दर्जा मिळाल्याने तिच्या वैभवात भर पडली आहे. मराठी भाषा संवर्धन आणि विकासासाठी शासनामार्फत विविध उपक्रम राबवले जात आहेत. तसेच, मराठी भाषिक आणि साहित्यिकांना अभिमानास्पद वाटेल, असे भवन येथे उभारले जाईल.

- दीपक केसरकर, मराठी भाषामंत्री