मुंबई - सोशल मीडिया प्लॅटफॉर्मवरील मीम्स आता केवळ मनोरंजनासाठी राहिलेल्या नाहीत. अशा प्रकारच्या मीम्स जनजागृतीचे माध्यम बनल्या आहेत. राजकीय पक्ष, सरकार, विविध संस्था, पोलीस इत्यादी हल्ली माहिती व जागरूकता पसरवण्यासाठी या मीम्सचा वापर करीत आहेत. हाच ट्रेंड जोपासत मुंबईच्या वाहतूक पोलिसांनी मंगळवारी ट्विटरवर जाऊन मराठी भाषादिनानिमित्त गाण्याच्या माध्यमातून रस्ते सुरक्षेची जनजागृती केली आहे.

ट्वीटमध्ये म्हटले आहे कि, मराठी भाषा गौरव दिनाच्या हार्दिक शुभेच्छा! पाहूया ही गाणी आपल्याला काय संदेश देत आहेत. या वाऱ्याच्या बसुनी विमानी सहल करूया गगनाची, वाहतूक सुरक्षेचे नियम देती निश्चिती सुरक्षित जीवनाची!

वहिनीला आणायला चांदोबाची गाडी, ज्यावर बसताना वापरू हेल्मेटची जोडी !

हिरवा निसर्ग हा भवतीने जीवन सफर करा मस्तीने, पण ते करत असताना सीटबेल्टही लावू आठवणीने !

वाहतूक पोलिसांकडून भरधाव वेगात वाहन चालवणे, हेल्मेटचा आणि सिटबेल्टचा वापर न करणे या नियम उल्लंघनांबद्दल जागरूकता निर्माण करण्यासाठी मराठी गाण्याच्या ओळी वापर करण्यात आला आहे.