नवी मुंबई मनसे शहर अध्यक्ष गजानन काळे यांना मोठा झटका बसला आहे. ठाणे सत्र न्यायालयाने त्यांचा जामीन अर्ज फेटाळून लावला आहे. जीवाला धोका असल्यामुळे जामीन अर्ज फेटाळावा अशी साक्ष संजिवनी काळे यांनी कोर्टात दिली. त्यानंतर कोर्टाने गजानन काळे यांचा जामीन अर्ज फेटाळला. मागील दहा दिवसांपासून गजानन काळे फरार आहेत. अद्याप त्यांना अटक करण्यात आलेली नाही. गजानन काळे यांच्याविरोधात त्यांच्या पत्नीने मानसिक, जातीवाचक शिवीगाळ व शारीरिक छळ करत असल्याची तक्रार केली होती.

गजानन काळे यांच्या पत्नी संजिवनी काळे यांनी न्यायासाठी कृष्णकुंजवर धाव घेतली आहे. गजानन काळे यांना अटक करण्यात यावी, यासाठी राज ठाकरे यांची संजिवनी काळे यांनी भेट घेतली आहे. गजानन काळे यांनी केलेल्या अत्याचाराविरोधात संजिवनी काळे या राज ठाकरे यांच्याकडे दाद मागणार आहेत. परंतु, राज ठाकरे हे सध्या पुण्यात आहेत. त्यामुळे संजीवनी काळे आपले गाऱ्हाणे शर्मिला ठाकरे यांच्याकडे मांडले. तसेच या सगळ्यानंतर राज ठाकरे यांच्याकडून गजानन काळेंवर कारवाई केली जाणार का, याकडे सर्वांचे लक्ष लागले आहे.

नेमकं काय आहे प्रकरण?

मानसिक व शारीरिक छळ (mental and physical harassment) करण्यात येत असल्याची तसेच जातीवाचक शिवीगाळ करण्यात येत असल्याची तक्रार गजानन काळे यांच्याविरोधात त्यांच्या पत्नीने केली. त्यानुसार नेरूळ पोलिसांनी (nerul police) गजानन काळे यांच्या विरोधात छळवणुकीसह इतर कलमाखाली गुन्हा दाखल केला. मागील काही वर्षांपासून गजानन काळे आपल्याला मारहाण करीत असून जातीवाचक शिवीगाळ करीत असल्याची तक्रार गजानन काळे यांच्या पत्नीने केली आहे. गजानन काळे यांचे बाहेरील महिलांशी संबंध असल्याने आपल्यावर घरात अन्याय करीत असल्याचेही त्याच्या पत्नीने पोलिसांना दिलेल्या तक्रारीत म्हटले आहे. 2008 मध्ये लग्न झाल्यानंतर 15 दिवसांतच गजाननने किरकोळ घरगुती कारणावरून भांडण करून सावळा रंग व जातीवरून आपल्याला टोमणे मारून जातीवाचक शिवीगाळ करण्यास सुरुवात केल्याचे तसेच गजानन याने आपल्याला मारहाण केल्याचे देखील त्याच्या पत्नीने तक्रारीत म्हटले आहे.