शिवसेना आणि महाराष्ट्र नवनिर्माण सेनेतील पोस्टरवॉरला रंग चढला आहे. याआधी शिवसेना आणि उद्धव ठाकरे यांच्याविरोधात भूमिका घेत मनसेने सेना भवनाबाहेर बॅनर झळकवले होते. त्यानंतर आज सामना कार्यालयाबाहेर मनसेने खासदार संजय राऊत यांच्यावरच निशाणा साधला आहे. (MNS teases Sanjay Raut)

शिवसेनेचे खासदार संजय राऊत यांनी राज ठाकरे हे महाराष्ट्राचे ओवैसी आहेत, असं विधान केलं होतं. ठाकरे म्हणजे भाजपचा भोंगा असल्याचं ते म्हणाले. यानंतर मनसेने पोस्टरबाजी करत प्रत्युत्तर देण्याचा प्रयत्न केला. (Mosque Loud Speaker Controversy)

ओवैसी कोणाला बोलता संजय राऊत? तुमचा कर्कश भोंगा बंद करा. तुम्ही मशीदीमधील मौलाना आहात का? असा प्रतिप्रश्न मनसेने उपस्थित केलाय. यासोबतच मनसेकडून राऊतांच्या पल्टी झालेल्या गाडीचा फोटो टाकण्यात आला आहे. (Raj Thackeray)

संजय राऊत मनसेच्या स्थापनेआधी राज ठाकरे यांची समजूत घालण्यासाठी 'कृष्णकुंज'वर आले होते. यावेळी आक्रमक मनसैनिकांनी संजय राऊत यांच्याविरोधात घोषणा दिल्या. आणि काही वेळाने त्यांची गाडी पल्टी करण्यात आली होती. हा फोटो या बॅनरवर लावण्यात आला आहे. या घटनेची पुनरावृत्ती व्हावी का? असा इशारा ही मनसैनिकांनी देत शिवसेनेला डिवचलंय. माहिम विधानसभा मतदार संघातील लक्ष्मण पाटील, उमेश गावडे, नितीन लाड या मनसेच्या कार्यकर्त्यांनी ही पोस्टरबाजी केली आहे.