डोंबिवली : मुंबई व उपनगरातील चाकरमान्यांसाठी लोकलसेवा ही जीवनवाहिनी आहे. याच जीवनवाहिनीचे सारस्य करणारे मोटरमन हेही त्यामध्ये महत्त्वाची भूमिका बजावतात. मात्र, ते फारसे प्रकाश झोतात कधी येत नाहीत.

लोकल प्रवाशांच्या सेवेसाठी कायम तत्पर राहिल्यानंतर निवृत्तीच्या दिवशी त्याच लोकल प्रवाशांकडून मिळालेलं प्रेम पुरुषोत्तम यांच्यासाठी एक आगळी वेगळी भेट ठरलं आहे. मोटरमन पुरुषोत्तम (Motorman Purushottam) यांचा बुधवारी निवृत्तीचा दिवस होता. त्यासाठी अंबरनाथ - सीएसएमटी लोकल (Ambernath - CSMT Local) ही फुलांनी सजविण्यात आली होती, बॅनरही लागला.

अंबरनाथ स्थानकात ते लोकल घेऊन येताच फलाटावर उपस्थित प्रवाशांनी टाळ्यांचा कडकडाट करत त्यांच्या सेवेप्रती आपली कृतज्ञता व्यक्त केली. याचा व्हिडिओ समाज माध्यमांवर व्हायरल झाला आहे.

मध्य रेल्वेचे (Central Railway) मोटरमन पुरुषोत्तम हे बुधवारी सेवेतून निवृत्त होत आहेत. नोकरीच्या शेवटच्या दिवसाची सुरुवात त्यांची अंबरनाथ - सीएसएमटी लोकलनं होणार होती. त्यांच्या निवृत्तीसाठी अंबरनाथ लोकल फुलांनी, फुग्यांनी सजविण्यात आली होती. तसेच लोकलच्या पुढे त्यांच्या निवृत्तीनिमित्त शुभेच्छा देणारा बॅनर ही लावण्यात आला होता.

सकाळी 8.27 मिनिटांनी अंबरनाथ स्थानकातून सीएसएमटीला जाण्यासाठी ही लोकल सुटते. अंबरनाथ यार्डातून रेल्वे स्थानकात लोकल घेऊन येत असताना फलाटावर उपस्थित प्रवाशांनी टाळ्यांचा कडकडाट करत त्यांचं स्वागत केलं. तसंच त्यांच्या सेवेप्रती आपली कृतज्ञता व्यक्त केली. काही प्रवाशांनी हा प्रसंग आपल्या मोबाईलमध्ये कैद केला असून तो सोशल मीडियावर सध्या प्रचंड व्हायरल होत आहे.