मुंबई : महानगर पालिकेच्या शहरी वनाची आता सिनेमांसह कॉर्पोरेट जगतालाही मोह पडला आहे. भक्तीपार्क येथील मियावाकी वनात चित्रीकरणासह पिकनीकसाठी कल वाढू लागला आहे.पुर्व उपनगरातील 98 हजार चौरस मिटर क्षेत्रफळावर पसरलेले हे सर्वात मोठे उद्यान आता चांगलेच बहरले आहे.

महानगर पालिकेने शहरी वनिकरणासाठी मियवाकी हे जापानी तंत्रज्ञान स्विकारले आहे.मुंबईतील अनेक भागात वेगाने वाढणारी ही वने तयार करण्यात येत आहेत.26 जानेवारी 2020 मध्ये या वनीकरणाला प्रारंभ झाला.अल्पावधीतच हे शहरी वन सिनेमा,जाहीराती,मालिका जगतात प्रसिध्द झाले आहेत.या वनात चित्रीकरणासाठी महानगर पालिकेकडे अर्ज येऊ लागले आहेत.तर,कॉर्पाेरेट कंपन्याचे क्रिडा महोत्सवही होत आहेत.अशी माहिती महानगर पालिकेकडून देण्यात आली.

या उद्यानाचे दोन भागात विभाजन करण्यात आले आहे.58 चौरस मिटरवर वन विकसीत करण्यात आले आहे.तर,40 हजार चौरस मिटरवर खेळाचे मैदान तयार करण्यात आहे.या उद्यानात तब्बल तीन किलोमिटर लांबीचा वॉकिंग ट्रॅकही तयार करण्यात आला आहे.---नक्षत्र उद्यान

12 राशींचे व 27 नक्षत्रांचे शास्त्रीय महत्त्व सांगणारे नक्षत्र उद्यान फुलले आहे. विशेष म्हणजे यातील बरीच झाडे दुर्मिळ आहेत. नक्षत्र उद्यानाला भेट देणार्‍याला आपल्या राशीचे कोणते झाड आहे, याची माहिती मिळते. राशी व नक्षत्रानुसार एकूण २७ प्रजातींचे मोठे वृक्ष असून यामध्ये वड, पिंपळ, आवळी, उंबर, जांभळी, खैर, वेलु, नागचाफा, पळस, बेल, अर्जुन, सांबर, फणस, शमी, रुई, कडूलिंब, मोह, इत्यादींचा समावेश आहे.

पक्षीनिरीक्षणासाठी पर्वणी

नागरी वन प्रकल्पात जवळपास 57 हजार देशी व औषधी प्रजातीच्या वृक्षांची लागवड करण्यात आली आहे. त्यात पळस, बेहडा, सीताफळ, बेल, पेरू, सीता, अशोक, हरडा, खैर, बदाम, काजू, रिठा, बकुळ, आवळा, अर्जुन अशा प्रजातींचा समावेश आहे. वृक्षांचे घनदाट जंगलात रूपांतर होण्याची नैसर्गिक प्रक्रिया सुरू आहे. त्यासोबत विविध प्रजातीची फुलपाखरे, पक्षी, कीटक यांचा नैसर्गिक अधिवास म्हणून देखील हे उद्यान विकसित होत आहे.

विरंगुळा करण्यासाठी येणाऱ्यां बरोबरच पक्षीनिरीक्षण करणार्‍यांसाठी हे पर्वणीच ठरत आहे.तर उद्यानाच्या इतर भागात देशी, परदेशी औषधी प्रजातींची सुमारे दोन हजारपेक्षा मोठी फुलझाडे व फळझाडे आहेत. यामध्ये प्रामुख्याने खैर, सुरंगी, आवळा, अर्जुन, पिंपळ, उंबर, बकुळ, आंबा, जांभूळ, कांचन, बदाम, निलगिरी, फणस, भोकर, बेल, सुरू, रॉयल पाम, कडीपत्ता, नारळ इत्यादींचा समावेश आहे.