Mumbai Corona Update : कोरोनाच्या वाढत्या रुग्णसंख्येमुळे जगभरात सध्या चिंतेचे वातावरण पाहायला मिळत आहे. तसेच या पार्श्वभूमिवर सर्व सरकारी यंत्रणा देखील हाय अलर्टवर आहेत. प्रशासनाकडून कोरोना बाबत कठोर पावले उचलली जात असताना मुंबई विमानतळावर परदेशातून आलेल्या नागरिकाची कोरना चाचणी पॉझिटिव्ह आढळ्याचे समोर आल्याने मुंबईकरांची चिंता वाढली आहे.

मुंबईत दिवसभरात ९ रुग्णांची नोंद

मुंबईतून कोरोना हद्दपार होण्याची चिन्हे दिसू लागली असून गुरुवारी दिवसभरात ०९ कोरोना बाधित रुग्णांची नोंद झाली आहे. यामुळे कोरोना बाधित रुग्णांची संख्या ११ लाख ५५ हजार ११७ वर पोहोचली आहे. तर दिवसभरात शून्य मृत्यूची नोंद झाल्याने मृतांची संख्या १९ हजार ७४६ वर स्थिरावली आहे.

दरम्यान, दिवसभरात ०३ रुग्णांनी कोरोनावर मात केल्याने आतापर्यंत ११ लाख ३५ हजार ३२१ रुग्णांनी कोरोनाला हरवले आहे. त्यामुळे ५० सक्रिय रुग्ण आहेत.

परदेशातून आलेला प्रवासी २८ डिसेंबर रोजी मुंबईत दाखल झाला आहे. दरम्यान हा प्रवासी नेमका कोणत्या देशातून आला आहे हे अद्याप समजू शकलेले नाही. चीनमधल्या कोरोनाच्या बातम्यांनी जगभरात दहशत पसरली आहे असताना अनेक देशांनी कोरोना प्रतिबंधक नियम लागू केले आहेत. भारत सरकारनेही याबाबत कठोर पावलं उचलायला सुरुवात केली आहे.

चीनसह अमेरिका, जपान दक्षिण कोरिया या देशांमध्ये कोरोना वाढत आहे. त्या पार्श्वभूमीवर भारत सरकारने आज मोठा निर्णय घेऊन सहा देशांतून येणाऱ्या नागरिकांवर निर्बंध लादले आहेत. केंद्रीय आरोग्यमंत्री मनसुख मांडविया यांनी ट्विट करुन ही माहिती दिली.

१ जानेवारी २०२३ पासून चीन, हाँगकाँग, जपान, दक्षिण कोरिया, सिंगापूर आणि थायलंडमधून आलेल्या प्रवाशांना आरटीपीसीआर टेस्ट बंधनकारक करण्यात आलीय. त्यांना प्रवासापूर्वी आपला रिपोर्ट एअर सुविधा पोर्टलवर अपलोड करावा लागेल असं ट्विट आरोग्यमंत्र्यांनी केलं आहे.